Jetisý oblysynyń Taldyqorǵan qalasynda Qazaqstan halqy Assambleiasynyń 30 jyldyǵyna arnalǵan «Kazakhstan: Ethno-Inclusive Dialogue» atty tuńǵysh halyqaralyq inkliýzivti etnokórme ótti, dep habarlaidy Dalanews.kz
Is - sharany oblystyq jumyspen qamtýdy úilestirý jáne áleýmettik baǵdarlamalar basqarmasy men Taldyqorǵan qalasy ákimdiginiń qoldaýymen «Meiirim» múgedekterdiń qoǵamdyq birlestigi uiymdastyrdy.
Kórme ortalyǵynyń ǵimaratynda ótken is-sharanyń negizgi maqsaty – óner men mádeniet arqyly inkliýziiany ilgeriletý. Erekshe qajettiligi bar jandardyń óz qolymen jasaǵan avtorlyq buiymdarynyń tanystyrylýyna erekshe nazar aýdaryldy.
- Biz shyǵarmashylyqtyń shegi joq ekenin kórsetýge tyrystyq. Múgedektigi bar adamdar jai ǵana kórermen emes, mádeni dialogtyń tolyqqandy qatysýshysy da bola alady. Bul kórmede biz muny ashyq jariialaýǵa múmkindik aldyq. Biz jai ǵana kórme emes, qarym-qatynas ornatatyn, shabyt alatyn, jańa múmkindikterge jol ashatyn alań qurýǵa tyrystyq. Kóptegen qatysýshylar is-shara barysynda jańa tutynýshylar men seriktester tapty, - dep atap ótti «Meiirim» MQB tóraǵasy Gúlvira Taýbaldinova.
Jalpy kórmege kelýshiler otandyq jáne Resei, Túrkiia, Ózbekstannan kelgen sheteldik sheberlerdiń qolynan shyqqan buiymdarynyń kórme-jármeńkesin aralap, qolónershilerdiń sheberlik sabaqtaryna qatysyp, jergilikti ártister men shyǵarmashylyq ujymdardyń ónerlerin tamashalady.
Bul is-shara túrli múmkindikter men kózqarastardaǵy adamdar arasynda altyn kópir qyzmetin atqaratyn ashyq jáne tolerantty qoǵam qurýǵa baǵyttalǵan mańyzdy qadam boldy.
Jetisý oblysyndaǵy kórme uiymdastyrýshylardyń aitýynsha, óńirde ár adamnyń óz qundylyǵyn sezindiretin jáne óz áleýetin iske asyra alatyn inkliýzivti qoǵamdy damytýǵa baǵyttalǵan bastamalarǵa árdaiym qoldaý bildiriledi.
