5 aqpan kúni Qazaqstan aýmaǵynda, Almaty qalasynan soltústik-shyǵysqa qarai 284 shaqyrym qashyqtyqta jer silkinisi tirkeldi, dep habarlaidy Dalanews.kz.
Tótenshe jaǵdailar ministrliginiń málimetinshe, jer silkinisi Astana ýaqytymen saǵat 13:42-de seismikalyq stansalar jelisi arqyly anyqtalǵan. Jerasty dúmpýiniń oshaǵy Qazaqstan aýmaǵynda ornalasqan.
Jetisý oblysynyń birqatar eldi mekenderinde jer silkinisi sezilgen. Atap aitqanda, Panfilov aýdanynda, Tekeli qalasynda, Aqsý aýdanynyń Jansúgirov aýylynda jáne Sarqan qalasynda dúmpýdiń kúshi 3 balǵa jetken.
Al Qarabulaq kenti, Taldyqorǵan qalasy, Balpyq bi aýyly, Shonjy, Saryózek, Úshtóbe, Qyrǵyzsai, Kókpek jáne Shelek aýyldarynda jer silkinisi 2 ball shamasynda sezilgen.
Tótenshe jaǵdailar ministrliginiń dereginshe, zardap shekkender men qiraǵan nysandar týraly aqparat túsken joq. Jaǵdai baqylaýda.
