Solardyń biri – Sýraia Razmýhammadqyzy úiinen shaǵyn tigin tsehyn ashyp, tirligin dóńgeletip otyr. Ol biyl memleketten 340 myń teńge kóleminde qarjy alyp, 2 tigin mashinkasyn iske qosqan.
Negizinde ol qazaqy oiý-órnegi mol kamzol, kóilek, nymsha jáne qyz jasaýyn tigedi.
«Úsh balashaǵam bar. Úide bos otyrmaýdy oilap, otaǵasymen aqyldasyp, osy kásipti ashtyq. Tapsyrys jaman emes. Jazdyń kúnderi ásirese qyz jasaýlaryna suranys kóp bolady. Al qystyń kúni kóktemgi satylymdarǵa zattar daiyndaimyn. Aiyna shamamen 40-50 myń teńge kóleminde tabys tabamyn. Aldaǵy ýaqytta kásibimdi keńeitsem degen armanym bar», — deidi Sýraia Razmýhammadqyzy.
Otaǵasy Ábibýlla Maqsatuly da jumysbasty. Ol búginde jergilikti sharýa qojalyqtyń birinde jumys isteidi. Aitýlarynsha, bul otbasy Jańaaýyl okrýgi Inter aýylynan kóship kelgen.
Al jetisailyq Ýsmanqulovtar shaǵyn naýbaihana ashyp, tabysyn molaityp otyrǵan áýlet. Naýbaihana ustaýdy atakásibimiz deidi. Búginde erli-zaiypty Nurlan men Jadyra «Kúlparshyn» bazarynan shaǵyn nysandy jalǵa alyp, jumysyn jandandyryp úlgergen.
«Bizdiń shaǵyn tsehymyzda nan ónimderiniń 10 túri óndiriledi. Ataýly kómekten alǵan 382 myń teńgemizge pesh satyp aldyq. Ázirge áielim ekeýmiz barlyq tapsyrystardy qabyldap, pisirip berýdemiz. Qosymsha jumysshy alýǵa ázirge erterek sekildi. Aiyna shamamen as-aýqattan bólek, 100 myń teńge kóleminde paida tabamyz», — deidi Nurlan Ýsmanqulov.
