Ol aldymen Jetisai aýdany, J.Eraliev aýyldyq okrýgindegi «Nuraly jol» sharýa qojalyǵynda bolyp, maqta terý jumystarymen tanysty. Túrkistan oblysynyń ákimi Janseiit Túimebaev ministrge óńirdegi aýyl sharýashyly salasyndaǵy jetistikter men atqarylǵan jumystardy aityp ótti.
«Nuraly jol» sharýa qojalyǵy búginde 497 gektar jerge maqta, baqsha daqyldary, júgeri jáne jońyshqa ekken. Alpysqa jýyq adam jumys isteitin sharýa qojalyǵynyń 47 tehnikasy bar. Jumysshylardyń ailyq jalaqysy — 55 myń teńge. Sharýa qojalyǵynyń tóraǵasy E.Eralievtiń aitýynsha, maqta terim naýqany oidaǵydai ótip jatyr. «Táýelsizdiktiń 20 jyldyǵy» kanalynyń arqasynda biyl munda sý tapshylyǵy baiqalmaǵan. Osyǵan orai, jetisailyq diqandar sý máselesin sheship bergen Elbasyǵa riza ekenderin jetkizdi.
Ómirzaq Shókeev eń basty másele jerdi tiimdi paidalaný ekenin aitty.
«Biyl osy aimaqtyń diqandarynan sý tapshylyǵy baiqalyp jatyr degen shaǵym túsken soń Elbasy Tájikstan Prezidentimen sóilesip, qosymsha sý jiberilgen bolatyn. Endi biz jerdi neǵurlym tiimdi paidalanýǵa kóńil bólgenimiz jón. Aýyl sharýashylyǵy ónimderiniń kólemin 5 jylda 2,5 esege kóbeitý qajet. Ol úshin aýyl sharýashylyǵynda jańa ádis-tásilderdi meńgerip, jumysty kúsheitý kerek. Ósimdikterdi himiialyq emes, biologiialyq jolmen qorǵaýdy qolǵa alǵan abzal» dedi.
Aýyl sharýashylyǵy ministri odan keiin Sh.Dildábekov aýyldyq okrýginde ornalasqan «Táýelsizdiktiń 20 jyldyǵy» atyndaǵy mashinalyq kanalǵa bardy. Munda ol GNS-1, GNS-2 arasyndaǵy ózekti másele bolyp turǵan 9 shaqyrymdyq bóliginiń sý ótkizý qabiletiniń tehnikalyq jaǵdaiymen tanysty. 2011 jyly salynǵan kanal qurylysyna 13, 523 mlrd. teńge jumsalǵan. Búginde atalǵan aimaqtyń sý ótkizý qabileti tómendegen. Aldaǵy ýaqytta kúrdeli jóndeý jasalady degen jospar bar. Kanal 86,7 myń gektar egistik alqapty aǵyn sýmen qamtamasyz etýge qaýqarly.
Ministr Asyqata kentindegi «Korporatsiia Aq-Altyn» JShS-niń maqta shikizatyn óńdeý zaýytynyń jumysymen de tanysty. Bul zaýytta jylyna 60 myń tonna maqta shikizatyn qaita óńdeýden ótkiziledi. Naýqan kezinde 265 adam jumys isteidi. Munda óndirilgen ónimder TMD jáne shet memleketterge jóneltiledi. Aýyl sharýashylyǵy ministri osynda jiyn ótkizip, aýdandaǵy maqta óńdeý zaýytynyń basshylary sharýa qojalyqtarynyń tóraǵalarymen jáne treiderlik kompaniialardyń qatysýymen maqta shikizatynyń ózekti máselelerin talqylady.
Vitse-premer odan keiin Qaraqai aýyldyq okrýgindegi «Ketebai» óndiristik kooperativiniń egistik alqabyn aralap kórdi. 1996 jyly qurylǵan kooperativ ielegindegi 800 gektar egistik jerge maqta ekken. Maqtany ósirýge jáne terýge arnalǵan 60-qa jýyq tehnikasy bar. Diqandarmen júzdesken Ómirzaq Estaiuly Jetisaidaǵy maqta terimi jumystaryna oń baǵasyn berip, eńbekqor turǵyndarǵa tabys tiledi.
Túrkistan oblysy ákiminiń baspasóz qyzmeti
