QazMunaiGaz basshysy Maǵzum Myrzaǵaliev Mańǵystaýda ereýilge shyqqan jumysshylardyń ulttyq kompaniia quramyna kirý týraly talabyn oryndaý múmkin emes ekenin aitty dep jazady Dalanews.kz.
"Byltyr Mańǵystaý oblysyndaǵy ken oryndarda servis qyzmetin kórsetetin birneshe merdiger uiymnyń jumysshylary ulttyq kompaniianyń shtatyna qabyldaý týraly talap qoiǵany ras. Bul talapty oryndaý múmkin emes ekenin birneshe ret atap óken bolatynmyn. Bul, keminde, QazMunaiGazdyń enshiles mekemelerine jumysqa ornalasýǵa kezekte turǵan óńirdegi jumyssyz turǵyndarǵa qatysty ádiletsiz bolar edi", - dep atap ótti Maǵzum Myrzaǵaliev ulttyq kompaniia saitynda jariialanǵan suhbatynda.
Buǵan qaramastan, ulttyq kompaniianyń jumysshylardyń eńbek jaǵdaiyn, atap aitqanda tehnikany jańartý máselesinde kómektesýge daiyn ekeni aityldy.
"Degenmen, biz merdiger kompaniialar jumysshylarynyń eńbek jaǵdaiyn jaqsartý máselesine qatysty talaptardy oryndaýdan bas tartpaimyz. Buǵan deiin de jumysshylardyń talabyn qoldap, osyndai uiymdardyń birine úsh jyl ishinde 200-den astam tehnikany jańartýǵa kómektesýge kelistik. Bul kompaniia úshin aitarlyqtai soma, dese de osyndai sheshimge keldik", - dep qosty QMG basshysy.
Osyǵan deiin Mańǵystaýda QazMunaiGaz ken oryndarynyń birinde kólik qyzmetin kórsetetin "West Oil Software" mekemesiniń 400-den astam jumysshysy 2 aidan beri narazylyq bildirip, jumysyn toqtatqan bolatyn. Olardyń basty talaptarynyń biri – ulttyq kompaniianyń quramyna qosylý. WOS basshylyǵy kompaniiaǵa aitarlyqtai shyǵyn kelgennin aityp, júrgizýshilerdi jumystan shyǵaratynyn málimdegen. Narazylyq bildirgenderdiń 100-den astamy jumysqa oralǵany aitylǵan.
