Mınıstr ózi basqaratyn mınıstrlik pen QR Bas prokýratýrasymen tize qosyp syrttan jumys kúshin tartqan kásiporyndarda tekserý jumystaryn júrgizgen. Nátıjesinde biraz zań buzýshylyqtar áshkere bolypty.
Búshinde belgilengen kvotaǵa saı elimizde jumys isteıtin 2 425 kompanıa syrttan jumys kúshin tartqan eken. Óz kezeginde mınıstr atalǵan kompanıalarda 531 myń qazaqstandyq jumysshylar da eńbek etetinin tilge tıek etti.
– 8 qazan kúni elimizdegi 49 kásiporynda tekserý jumysy aıaqtaldy. Tekserý nátıjesinde elimizdiń eńbek jáne kóshi-qon zańyn buzǵan 791 fakt tirkeldi. Onyń ishinde 24 kompanıada eńbek aqy men syıaqy tóleýde 476 zań buzý faktsi anyqtalǵan. Aıtalyq,
Atyraý oblysyndaǵy «Neftestroıservıs LTD» JSHS jergilikti ınjenerlerdiń bir saǵattyq jumysyna 568 teńge tólese, dál osyndaı jumysty atqaratyn sheteldik mamannyń bir saǵattyq jumysyna 6 500 teńge tólegen.
Bul baryp turǵan soraqylyq. Jumys berýshi eńbekaqy taǵaıyndaýda zań talabyn eskerip, jergilikti jáne sheteldik jumys kúshine teń qaraýy tıis, – dep mınıstr qazaqstandyq jumysshylardyń bekerge shyryldap júrmegenin alǵa tartqandaı boldy.
Sonymen qatar mınıstrlik bir ǵana Atyraý oblysynda jyl basynan beri 364 jumys kúshin syrt elderden tartqanyn alǵa tartty.
Mınıstrliktiń bastamasymen qolǵa alynǵan tekserý biraz jaıtty sý betine shyǵarǵandaı boldy.
Jumys berýshilerdiń jergilikti mamandardy bulaısha tómendetýi qoǵamda áleýmettik arazdyq týdyratyny jasyryn emes. Sondyqtan mundaı teksreýlerdi mınıstrlik quzyrly organdarmen birlesip alty aı saıyn ótkizip, nátıjesin jurtshylyqqa jarıalap tursa, betimen ketken kompanıalar táýbasyna keleri anyq. Bul bir jaǵynan elimizde ádildik ornap, jergilikti jumysshylardyń quqynyń qorǵalýyna negiz bolar edi.
N.ÁÝBÁKİR
