Májiliste "Jer qoinaýy jáne jer qoinaýyn paidalaný týraly" kodekske túzetýler tanystyryldy. Túzetýlerdi talqylaý barysynda Májilis depýtattary Baqtyqoja Izmuhambetov pen Albert Raý sharpysyp qaldy, - dep habarlaidy Dalanews.kz.
Depýtat Baqtyqoja Izmuhambetov zań jobasyndaǵy normaǵa qatysty daýǵa aralasty. Norma boiynsha Geologiia komitetiniń geologiialyq aqparatty jinaý, saqtaý, esepke alý, júieleý jáne qamtamasyz etý jónindegi fýnktsiialary memlekettik organnan alynyp, aktsionerlik qoǵam (AQ) retinde qurylatyn ulttyq operatorǵa berilmek.
Depýtat Izmuhambetov jer qoinaýyn paidalaný salasyndaǵy uzaq jyldyq tájiribesine qaramastan, bul másele Úkimettiń qaraýyna onyń qatysýynsyz jiberilgenine narazylyq bildirdi. Ol áriptesteriniń keibiri lobbistik múddelerge qyzmet etip otyrǵanyn da aityp qaldy. Oǵan qosa kelisim rásimderi buzylǵanyna bailanysty aiyptady.
Al Albert Raý bul túzetýler Prezident Qasym-Jomart Toqaevtyń tapsyrmalary sheńberinde ázirlengenin jáne barlyǵy zańǵa sáikes jasalǵanyn málimdedi.
Talqylaý barysynda Izmuhambetov: "sózderime jaýap beremin", - dese, depýtat Raý: "Meni memleket múddelerin buzdy dep eshkim aiyptai almaidy", - dep jaýap berdi. Osylaisha, zań jobasyn talqylaý depýtattardyń arasynda shielenis týdyryp, pikir qaishylyǵyna alyp keldi.
Aita keteiik, bul qujatta Memleket basshysynyń tapsyrmalaryn iske asyrý boĭynsha «Jer qoĭnaýy jáne jer qoĭnaýyn paĭdalaný týraly» kodekske ózgerister men tolyqtyrýlar engizý kózdelgen. Túzetýler aiasynda jer qoĭnaýyn paĭdalanýdyń biryńǵaĭ portaly paĭda bolady.
Bul platforma arqyly jer qoinaýyn paidalanýǵa litsenziialardy alǵashqy ótinim qaǵidaty boiynsha berý kózdeledi. Sonymen qatar, jer qoinaýyn paidalanýdyń memlekettik qoryn basqarýdyń qazirgi eki kezeńdik baǵdarlamasyn alyp tastap, aýktsiondyq júie engizý usynylyp otyr. Osy arqyly protsesterdiń ashyqtyǵy men tiimdiligin arttyrý kózdelgen.
