Sarapshy jerdiń jekege satylýyna qarsy.
Onyń pikirinshe óne-boiy jemqorlanǵan, barmaq basty, kóz qystyǵa ábden beiimdelgen, oligarhiianyń aitqanymen ǵana júrip-turatyn qazirgi júiede jerdi jekemenshikke berý asa qaýipti.
Bul turǵyda Sátpaev jerdiń jekege satylýyna tabandy qarsylyq kórsetip, "jer iesi tek memleket bolýy tiis" degen ustanymdaǵy saiasatker Muhtar Taijandy tolyq qoldaitynyn aitady.
"Paraqorlyq qan-tamyryna aralasyp ketken, onsyz birde-bir memlekettik máselesi sheshilmeitin, búkil ekonomikasy oligarhtardyń "patsha kóńiline" laiyqtalyp qurylǵan myna júiede aýyl sharýashylyǵyndaǵy latifýndisterdiń pozitsiiasy óte-móte myqty. Jer týraly zańdamadan tyrnaq ushyndai ǵana ilik tapsa, olar bul múmkindikti múlt jibermeidi. Ózderiniń qolaiyna qarai paidalanyp, ulanǵaiyr aýmaqty pyshaq ústinen bólisip alady", – deidi ol.
Sátpaevtyń aitýynsha Jer týraly jańa zań jobasy qabyldanǵan kúnniń ózinde latifýndister men olardyń soiylyn soǵatyn top izin jasyrmaidy. Sondyqtan zań jobasyndaǵy shikilikter men kemshilikterdi kúni buryn kóre bilip, jerdi bólis-tartysqa salǵysy keletinderdiń jolyn kesý kerek.
...
Buǵan deiin Dalanews.kz Qazaqstan azamatyna jerdi jekemenshikke satýǵa qatysty 5 jylǵa moratorii jariialanǵanyn habarlaǵan.
Jer komissiiasyna jetekshilik etken vitse-premer Eraly Toǵjanovtyń aitýynsha jerge kelgende asyǵystyq jasaýǵa bolmaidy.
"Qazir qandai da bir sheshim qabyldaýǵa, eldi jan-jaqqa tartýǵa esh qaqymyz joq. Sondyqtan osyndai ortaq sheshim qabyldadyq", – dedi Toǵjanov.
Májilis depýtaty Aidos Sarymnyń aitýynsha osy aralyqta eldegi áleýmettik salada qordalanǵan problemalardy sheship, jer máselesine úlken daiyndyqpen jáne múldem basqa jaǵdaida oralatyn múmkindik bar.
Al saiasatker Muhtar Taijan moratorii týraly sheshim qabyldanbas buryn jer jekege satylar bolsa, mitingige shyǵýǵa ázir ekenin aitqan.
- Iá, biz daýys bergen kezde jeńilýimiz múmkin. Mundai jaǵdaida men jalpy ulttyq zańdy miting jariialaimyn. Búgingi tańda buǵan Zań múmkindik berip otyr. Bundai jaǵdaida ár qala, ár aýyl jer úshin shyǵý kerek.
Qalai bolsa da jerdi jeke menshikke satýǵa jol bermeýimiz shart. Mundaiǵa jol bersek, qazaqtyń balasy latifýndisterdiń quldyǵyna máńgilikke batyp ketedi. Urpaq bizdiń munymyzdy keshirmeidi, - dep jazǵan edi ol álemjelidegi paraqshasynda.
