Jeńimpazdarǵa qurmet kórsetildi
Túrkistan qalasyndaǵy J.Edilbaev atyndaǵy №18 mektep-gimnaziiasynyń oqýshylary Nur-Sultan qalasynda ótken «Ulttyq mektep ligasy» respýblikalyq týrnirinen jeńispen oraldy. Voleiboldan ótken jarys jeńimpazdarmen Túrkistan oblysy əkiminiń orynbasary Meiirjan Myrzaliev pen oblystyq dene shynyqtyrý jáne sport basqarmasynyń basshysy Qanat Joldyqaraevpen kezdesti. El mereiin ústem etken jas sportshylarǵa qoldaý kórsetip, sáttilik tiledi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Mindetti túrde ary qarai osy sportty damytyp, kásibi deńgeige shyǵarýǵa kúsh salý kerek. Biz tek qoldaimyz. Bul jeńis – óńirimizdiń jastaryna úlken úlgi. Aldaǵy saiystarda jeńis tuǵyrynan kórine berińizder, – dedi oblys ákiminiń orynbasary.
Oblys basshylyǵy tarapynan mektep oqýshylarynyń jattyqtyrýshy, deneshynyqtyrý pániniń muǵalimi Nurjigit Shektibaevqa qoshamet kórsetildi.
Ulttyq mektep ligasy El Táýelsizdiginiń 30 jyldyq mereitoiyna orai uiymdastyrylýda. Liga «Ushqyr dop» (gandbol), «Teńbil dop» (fýtzal), «Altyn dop» (basketbol), «Shubar dop» (voleibol), «Bylǵary dop» (fýtbol), «Bylǵary dop - Baldaýren» (fýtbol), Asyq atý, bes asyq, prezidenttik test, ústel tennisi, toǵyzqumalaq jarystarynan turady. Respýblikalyq doda Nur-Sultan, Kókshetaý, Shýche, Almaty, Semei, Qyzylorda, Shymkent, Taldyqorǵan, Pavlodar, Oral qalalarynda ótip jatyr.
Jalpy 9 sport túrinen 34 jarys ótedi, onda 3500-ǵa jýyq oqýshy qamtylady. Ligaǵa 850 tóreshi tartylǵan, 5-6, 7-8, 9-11 synyptardyń oqýshylary qatysady, jarystar 4 sáýirden bastap maýsymnyń aiaǵyna deiin jalǵasady.
