Jeltoqsan oqiǵasyna qatysqan aqtóbelik turǵyn 39 jyldan keiin aqtalyp shyqty, dep habarlaidy Dalanews.kz.
Aqtóbe qalasynyń turǵyny 1984 jyly Gýrev oblystyq partiia komiteti men Maqat lokomotiv deposy kásipodaq komitetiniń joldamasymen Qazaq memlekettik ýniversitetiniń daiyndyq bólimine oqýǵa túsedi. 1985 jyly osy ýniversitettiń filosofiia jáne ekonomika fakýltetiniń stýdenti atanǵan.
Alaida, ony 1986 jyly qoǵamdyq tártipti buzdy degen aiyppen ýniversitettiń ekinshi kýrsynan shyǵarǵan. Onyń oqýdan shyǵarylýyna 1986 jyly 18 jeltoqsanda Jeltoqsan oqiǵasyna qatysty degen kúdikpen quqyq qorǵaý organdary qyzmetkerleriniń aiyp taǵýsyz ustalýy sebep bolǵan.
Keiin bosatylǵanymen stýdent KOKP qatarynan shyǵarylyp, qýǵyn-súrginge ushyrap, jumysqa tura almaǵan. Sol ýniversitettiń filosofiia fakýltetin bitirgen onyń áieli de osyndai sebeptermen jumysqa ornalasa almai, túrli kedergilerge kezdesken. 1990–1993 jyldary olardyń úsh kishkentai balasy bar otbasy baspanany jalǵa alýǵa májbúr bolǵan jáne áleýmettik jaǵynan osal jaǵdaiǵa tap bolǵan.
2025 jyly Jeltoqsan oqiǵasynyń kýágeri 64 jastaǵy azamat 1986 jylǵy Almatydaǵy Jeltoqsan oqiǵasyna qatysýyna bailanysty saiasi qýǵyn-súrgin faktisin taný týraly sotqa talap qoiýmen júgingen.
Aqtóbe qalalyq No3 soty isti zerttei kele, aryzdanýshynyń shynymen de 1986 jylǵy Jeltoqsan oqiǵasyna qatysqanyn jáne saiasi qýdalaýǵa, onyń ishinde eńbek quqyqtaryn shekteýge ushyraǵanyn anyqtaǵan. Bul mán-jailar ýniversitet pen Almaty qalalyq prokýratýrasynyń arhivtik anyqtamalarymen, sondai-aq kýálerdiń aiǵaqtarymen rastalǵan.
Azamattyq protsestik kodeksiniń 306-babyn jáne «Jappai saiasi qýǵyn-súrgin qurbandaryn aqtaý týraly» Zańnyń 2-babyn basshylyqqa ala otyryp, sot talap qoiýshyny 1986 jylǵy oqiǵaǵa bailanysty saiasi qýǵyn-súrgin qurbany dep tanydy.
Sottyń sheshimi zańdy kúshine endi.
