Jeltoqsan aiynda Qazaqstanda milliardtaǵan teńge kólemindegi qarajatty qamtyǵan birqatar iri qarjylyq qylmystar áshkerelendi, dep habarlaidy Dalanews.kz.
Finnews.kz derekterine súiensek, bir ai ishinde anyqtalǵan keibir ister boiynsha shyǵyn kólemi júzdegen milliard teńgege jetken.
Onlain-kazino arqyly transshekaralyq aýdarymdar
Tergeý barysynda 600 mlrd teńgeden astam qarajattyń zańsyz onlain-kazino paidasyna aýdarylǵany anyqtaldy. Quqyq qorǵaý organdary «drop» jelisin áshkerelep, aqsha bank shottary men «kriptokoshelekter» arqyly elden shyǵarylǵanyn habarlady.
«Qyran» turǵyn úi kesheni (Astana)
Bul is boiynsha 7,9 mlrd teńgeden astam qarajattyń zańsyz tartylǵany belgili boldy. Tergeý derekterine sáikes, azamattarǵa baspana «naryqtan tómen baǵamen» usynylǵanymen, kelisimder menshik quqyǵyn bermeitin brondaý jáne zadatok túrinde rásimdelgen.
Áleýmettik turǵyn úi salasyndaǵy shema
Astanada áleýmettik turǵyn úige qatysty is boiynsha 2,3 mlrd teńgeden astam qarajatty zańsyz iemdený faktileri anyqtalǵan. Shema jalǵan qujattardy paidalaný arqyly júzege asqan. Qazirgi tańda tergeý jalǵasyp jatyr.
Dala SK Construction / Irtysh Riverside jobasy
Atalǵan qurylys jobasy aiasynda 1 mlrd teńgeden astam úlesker qarajaty zańsyz tartylǵan. Tergeý materialdaryna sáikes, aqsha tiisti qujattarsyz jinalǵan. Is boiynsha uiymdastyrýshy qamaýǵa alynǵan.
Kóshe jaryǵyn jańartý (Óskemen, Semei)
Óskemen men Semei qalalarynda kóshe jaryǵyn jańartý jobasy kezinde 320 mln teńge kóleminde zalal keltirilgen. Tergeý derekterine sáikes, jabdyqtar men oryndalǵan jumystardyń quny qoldan ósirilgen. Úsh kúdiktige qatysty 7 jylǵa deiin bas bostandyǵynan aiyrý jazasy qarastyrylyp otyr.
Meditsinalyq jabdyqtardy satyp alý
Meditsinalyq jabdyqtardy satyp alý kezinde 115 mln teńge kólemindegi qarjyny jymqyrý faktisi tirkelgen. Satyp alýlardy jasandy túrde bólshekteý jáne affilirlengen kompaniialar arqyly baǵany kóterý faktileri anyqtalǵan. Burynǵy bas dárigerge qatysty bultartpaý sharasy retinde kepil qoldanylǵan.
