Áleýmettik jelide tuńǵysh prezident Nursultan Nazarbaevtyń portreti qoqysta jatqany kórinetin video tarady, - dep habarlaidy Dalanews.kz.
Jelidegi málimetke súiensek, video Astanada túsirilgen. Al jeli qoldanýshylary arasynda bul jait qyzý talqyǵa tústi.
"Uiattary joq, aparyp ilgen adam da týra sol jerden tabylmaitynyna kepildik bar ma?", "30 jyl soǵyssyz ómir súrdik. Dastarhanymyzda nan bar, balalarymyz tegin oqidy. Qazaqstandyqtar bulai jasaýǵa bolmaidy", - deidi olar.
Keiingi kezde Nazarbaevtyń sýreti bar týyndylar jer-jerden alynyp tastalyp jatyr. Alǵash ret Taldyqorǵanda Nazarbaevtyń eskertkishi qulatyldy. Sonymen qatar, Astanadaǵy Ulttyq qorǵanys ýniversitetiniń aýmaǵynan da tuńǵysh prezident Nursultan Nazarbaevtyń 2020 jyly 80 jyldyǵyna orai saltanatty túrde ashylǵan eskertkishi alynyp tastaldy.
Al keiin Almatydaǵy metrobeketteriniń birinen Nazarbaevtyń sýreti alynyp tastaldy. Artynsha Nursultan Nazarbaevtyń Astanadaǵy taǵy bir eskertkishi alynyp tastaldy. Bul joly onyń Ulttyq mýzeidegi eskertkishi alynyp tastalǵan edi. Ol eskertkish 2018 jyly ornatyldy.
Tipti elbasy sózi kezdesetin nagradalarǵa da ózgeris endi. "Elbasynyń qaýipsizdigin erlikpen qamtamasyz etkeni úshin" medali "Laiyqty qyzmeti úshin" medali bolyp ózgertildi. "Elbasynyń qorǵany" tósbelgisi budan bylai "QR Memlekettik kúzet qyzmetiniń qurmetti qyzmetkeri" dep atalady.
Sondai-aq, jýyrda Qazaqstanda nazarbayev.kz saity jumys istemei qaldy. Sait qashannan bastap qosylmai qalǵany belgisiz. Saitqa kirgen kezde ashylmai turǵany baiqaldy. Al 2023 jyly tuńǵysh prezident Nursultan Nazarbaevtyń resmi saitynan "elbasy" sózi alyp tastalǵan edi. Saittyń domeni ózgerip, nazarbayev.kz boldy.
