Naýryz aiynyń basynda esirtki, psihotroptyq zattardyń, sol tektesterdiń, prekýrsorlardyń jáne kúshti zattardyń zańsyz ainalymyna qarsy is-qimyl máseleleri boiynsha engizilgen zańnamalyq túzetýler kúshine endi. Esirtki óndirý men ótkizýdi uiymdastyrýshylar úshin jaýapkershilik kúsheitildi. Sonymen qatar esirtkini jasyryp qoiyp ketýshiler úshin jazalar birshama jeńildetildi, - dep habarlaidy Dalanews.kz.
Ortalyq kommýnikatsiialar qyzmetiniń podkastynda IIM basshysy Erjan Sádenov esirtki qylmysyna qarsy kúreske jáne jalpy profilaktikaǵa baǵyttalǵan sharalar týraly aitty.
«Esirtki – jalpy ultqa tóngen qaýip. Adamǵa, memleketke, beibitshilikke tóngen qaýip. Profilaktikalyq is-sharalar barysynda biz osyny jetkizýge tyrysamyz. Prezidenttiń tapsyrmasy boiynsha Esirtki biznesine qarsy kúres komitetin qurý arqyly jumysty kúsheittik. Buryn qylmystyń osy jasyryn túrin qalai ashýǵa bolatyndyǵyn biletin politseiler qyzmetkerler retinde taǵaiyndalsa, qazir biz aldyn alý baǵyty boiynsha qarastyryp jatyrmyz. Onda politseiler ǵana emes, azamattyq qoǵamdy da tartamyz: ǵalymdardy, qoǵam ókilderin, eriktilerdi», - dedi Erjan Sádenov.
IIM basshysy ótken jyly zańsyz ainalymnan 20 tonnadan astam esirtki tárkilengenine basa nazar aýdardy.
«Qazirgi kezde esirtkiniń ishindegi eń qaýiptisi – sintetika ekenin atap ótken jón. Ókinishke orai, ony bizde de daiyndaidy. Komponentter shetelden jetkiziledi. Búginde prekýrsorlardan kontrabandany zańsyz ákelý boiynsha birqatar zańnamalyq shara qabyldadyq. Respýblika aýmaǵynda ótken jyldyń ózinde 70-ke jýyq esirtki zerthanasy anyqtaldy», – dedi spiker.
Qarastyrylǵan jazaǵa toqtala kele, Erjan Sádenov onyń proportsionaldy bolýynyń mańyzdylyǵyn atap ótti.
«Qabyldanǵan normalar esirtki taratýmen ainalysatyn uiymdastyrýshylarǵa, satýshylarǵa qatysty qatańdatyldy. Al esirtkini jasyryp qoiyp ketýshilerge qatysty, bul negizinen úkimdi shyqqannan keiin koloniialarǵa jiberiletin jastar, qyzmetkerler olarmen jumys isteidi. Bolashaqta olardyń kóbi eriktiler bolady. Proportsionaldylyq bolsyn degen mindet qoiyldy: uiymdastyrýshylar, satýshylar, óndirýshiler úshin eń aýyr jaza bolýy kerek. Nóldik tózimdilik te bolýǵa tiis», – dedi IIM basshysy.
