Jem ózeniniń Aqtóbe oblysy shekarasyna deiingi boiynda sý deńgeii keiingi táýlikte 6 santimetrge tómendedi. Degenmen aldaǵy kúnderi Jaiyqtyń deńgeii qaýipti mejeden asýy múmkin. Qanat Bozymbaev oblys ákimdigine múddeli memlekettik vedomstvolarmen birlesip, eki kún ishinde Jaiyq ózenine qatysty boljamdy usynýdy tapsyrdy, - dep habarlaidy Dalanews.kz.
Qazir qorǵanysh bógeti turǵyzylyp, Atyraýdy ainalyp ótetin arnalar salý jóninde naqty jospar ázirlenip jatyr.
"Atyraý oblysynda Jaiyq ózeniniń deńgeii 15-20 kún ishinde aitarlyqtai kóterilýi múmkin. Sarapshylardyń boljamy osyndai. Ádette sý Resei Federatsiiasy shekarasynan ótip elge jetkenshe 20-25 kún bolady. Biraq ol sýdyń kólemi men aýa raiyna tikelei bailanysty", - dedi premer-ministrdiń orynbasary Qanat Bozymbaev.
Aita keteiik, 6 óńirde 4 myńǵa jýyq jekemenshik úi sý astynda qaldy. Jerlikti jerlerdegi 155 avtojol ýchaskesin sý shaiǵan. Taǵy 88 ýchaske baqylaýǵa alyndy, onyń tórteýi - kópir. Al 58 eldi meken kólik qatynasynan ajyrap otyr. Olarǵa azyq-túlik pen dári-dármek jetkizilip jatyr.
Premer-ministrdiń orynbasary Qanat Bozymbaev sý tasqynyna qatysty eldegi ahýal kúrdeli ekenin málimdedi. Aimaqtardaǵy qutqarý sharalaryna 17 myńnnan asa adam tartylǵan. 1900-den asa arnaiy tehnika men 500 dana sý sorý, júzý quraldary bar.
Buǵan deiin Atyraý oblysy Jylyoi aýdany Qulsary qalasynda sý tasqyny bolǵan edi. TJD málimetinshe, bul qaladaǵy jumystarǵa JAO, politsiia, áskeri bólimniń, TJD 323 qyzmetkeri, 142 tehnikasy, eriktiler men jergilikti turǵyndar arasynan 4540 adam jumyldyrylǵan.
Alaida sý tasqynynan zardap shekkender qatary saǵat saiyn artyp barady. Biri týystarynyń úiin jaǵalasa, biri aýyl mektepterin panalap jatyr. Turǵyndar uialy bailanys sapasy da nasharlaǵanyn aitady.
Al 4 sáýirde saǵat 09:50 shamasynda A-33 Dossor-Qulsary tasjolynyń 101-shaqyrymynda Jem ózeniniń arnasynan sý tasyp, joldy sý alyp ótken edi.
"Qazir erigen qar sýyn aǵyzý boiynsha jumystar atqarylyp jatyr. 10 adam men 4 tehnika jumyldyryldy", - dep habarlady QazAvtoJol buǵan deiin.
Sonymen qatar, Dossor - Qulsary - Beineý - Saiótes - Shetpe - Jetibai - Aqtaý tasjolynyń 4-119 shaqyrymynda kólik quralynyń barlyq túri úshin qozǵalys shekteldi.
