جەم وزەنىنىڭ اقتوبە وبلىسى شەكاراسىنا دەيىنگى بويىندا سۋ دەڭگەيى كەيىنگى تاۋلىكتە 6 سانتيمەترگە تومەندەدى. دەگەنمەن الداعى كۇندەرى جايىقتىڭ دەڭگەيى ءقاۋىپتى مەجەدەن اسۋى مۇمكىن. قانات بوزىمبايەۆ وبلىس اكىمدىگىنە مۇددەلى مەملەكەتتىك ۆەدومستۆولارمەن بىرلەسىپ، ەكى كۇن ىشىندە جايىق وزەنىنە قاتىستى بولجامدى ۇسىنۋدى تاپسىردى، - دەپ حابارلايدى Dalanews.kz.
ءقازىر قورعانىش بوگەتى تۇرعىزىلىپ، اتىراۋدى اينالىپ وتەتىن ارنالار سالۋ جونىندە ناقتى جوسپار ازىرلەنىپ جاتىر.
"اتىراۋ وبلىسىندا جايىق وزەنىنىڭ دەڭگەيى 15-20 كۇن ىشىندە ايتارلىقتاي كوتەرىلۋى مۇمكىن. ساراپشىلاردىڭ بولجامى وسىنداي. ادەتتە سۋ رەسەي فەدەراسياسى شەكاراسىنان ءوتىپ ەلگە جەتكەنشە 20-25 كۇن بولادى. ءبىراق ول سۋدىڭ كولەمى مەن اۋا رايىنا تىكەلەي بايلانىستى"، - دەدى پرەمەر-مينيستردىڭ ورىنباسارى قانات بوزىمبايەۆ.
ايتا كەتەيىك، 6 وڭىردە 4 مىڭعا جۋىق جەكەمەنشىك ءۇي سۋ استىندا قالدى. جەرلىكتى جەرلەردەگى 155 اۆتوجول ۋچاسكەسىن سۋ شايعان. تاعى 88 ۋچاسكە باقىلاۋعا الىندى، ونىڭ تورتەۋى - كوپىر. ال 58 ەلدى مەكەن كولىك قاتىناسىنان اجىراپ وتىر. ولارعا ازىق-تۇلىك پەن دارى-دارمەك جەتكىزىلىپ جاتىر.
پرەمەر-مينيستردىڭ ورىنباسارى قانات بوزىمبايەۆ سۋ تاسقىنىنا قاتىستى ەلدەگى احۋال كۇردەلى ەكەنىن مالىمدەدى. ايماقتارداعى قۇتقارۋ شارالارىنا 17 مىڭننان اسا ادام تارتىلعان. 1900-دەن اسا ارنايى تەحنيكا مەن 500 دانا سۋ سورۋ، ءجۇزۋ قۇرالدارى بار.
بۇعان دەيىن اتىراۋ وبلىسى جىلىوي اۋدانى قۇلسارى قالاسىندا سۋ تاسقىنى بولعان ەدى. تجد مالىمەتىنشە، بۇل قالاداعى جۇمىستارعا جاو، پوليسيا، اسكەري ءبولىمنىڭ، تجد 323 قىزمەتكەرى، 142 تەحنيكاسى، ەرىكتىلەر مەن جەرگىلىكتى تۇرعىندار اراسىنان 4540 ادام جۇمىلدىرىلعان.
الايدا سۋ تاسقىنىنان زارداپ شەككەندەر قاتارى ساعات سايىن ارتىپ بارادى. ءبىرى تۋىستارىنىڭ ءۇيىن جاعالاسا، ءبىرى اۋىل مەكتەپتەرىن پانالاپ جاتىر. تۇرعىندار ۇيالى بايلانىس ساپاسى دا ناشارلاعانىن ايتادى.
ال 4 ساۋىردە ساعات 09:50 شاماسىندا ا-33 دوسسور-قۇلسارى تاسجولىنىڭ 101-شاقىرىمىندا جەم وزەنىنىڭ ارناسىنان سۋ تاسىپ، جولدى سۋ الىپ وتكەن ەدى.
"ءقازىر ەرىگەن قار سۋىن اعىزۋ بويىنشا جۇمىستار اتقارىلىپ جاتىر. 10 ادام مەن 4 تەحنيكا جۇمىلدىرىلدى"، - دەپ حابارلادى قازاۆتوجول بۇعان دەيىن.
سونىمەن قاتار، دوسسور - قۇلسارى - بەينەۋ - سايوتەس - شەتپە - جەتىباي - اقتاۋ تاسجولىنىڭ 4-119 شاقىرىمىندا كولىك قۇرالىنىڭ بارلىق ءتۇرى ءۇشىن قوزعالىس شەكتەلدى.
