Búgin, ıaǵnı 28 sáýirde Sherzat Bolat isi boıynsha sotta kýáger Elmıra Nurbekovadan jaýap alynyp jatyr. Osy tusta, memlekettik aıyptaýshy Dana Sársenbaı kýágerdiń jaýaptarynyń arasynda qarama-qaıshylyqtardyń baryn alǵa tartty, dep habarlaıdy Dalanews.kz.
"Cizdiń tergeý kezinde bergen jaýabyńyzben osy kezekti jaýaptaryńyzben sáıkes kelmeıdi. 2024 jyldyń 5 qazanynda siz tergeýshilerge bala jerge qulap, qan-qan bolǵanyn, al Abzal pyshaqpen balany arqa jaǵynan urǵanyn kórgenińizdi naqty aıtqan edińiz. Osy jaýabyńyzdy qoldaısyz ba?", – dep surady Dana Sársenbaı.
Al kýáger Nurbekova óz jaýabynda:
"Ol kezde naqty esimde joq, men oryssha-qazaqsha aralastyryp jaýap bergenmin", - dep jaýap berdi.
Memlekettik aıyptaýshy Dana Sársenbaı kýágerdiń tergeý kezinde naqty jaýap bergenin atap ótip, sózin jalǵastyrdy.
"Tergep-tekserý kezinde siz bárin túsinip, naqty jaýap bergensiz. Qazir sotta kelgende qazaqsha túsinbedim dep otyrsyz. Hattama boıynsha sizdiń barlyq jaýabyńyz sol kúıinde jazylǵan", – dep qosty Dana Sársenbaı.
Elmıra Nurbekova óz jaýabynda tergeý kezinde "shok" kúıinde bolǵanyn jáne eki kún boıy tergeýshilermen jumys istegenin málimdedi.
"Biz eki kún tergeý ızolátorynda boldyq. Sharshadyq, tamaqtanbadyq, sý da ishpedik. Ne aıtqanym esimde joq, sol kezde tek úıge qaıtýdy oıladym", – dep túsindirdi ol.
Aıta keteıik, búgingi ashyq sot otyrysynda Sherzat Bolattyń isinde kýáger retinde tanylǵan Elmıra Nurbekovadan jaýap alynyp jatyr.
Kýágerdiń aıtýynsha, sottalýshylardyń biri ony arnaıy kafege shaqyrǵan. Aldymen olar sol jerde bas qosqan, keıin dúken mańyna bet alǵan. Buǵan deıingi sot tyńdaýynda Nurbekova qaqtyǵys kezinde jigitterdi sabyrǵa shaqyryp, janjaldy toqtatýǵa tyrysqanyn málimdegen edi.
Sot barysynda jábirlenýshilerdiń advokaty Meıirman Shekeev Elmıra Nurbekovadan Sherzat Bolattyń pyshaq jaraqatyn qaı jerden alǵanyn jáne ony qaıdan bilgenin surady. Advokat kýágerdiń tergeý kezinde qazaq tilinde jaýap bergenin, al sotta orys tilinde túsinik berip otyrǵanyna da nazar aýdardy. Ol tergeý men sottaǵy kýáger jaýabynyń aıyrmashylyǵyna kúmánmen qarady.
Eske sala keteıik, 10 sáýirde Taldyqorǵanda Sherzat Bolattyń ólimine qatysty sot prosesi bastaldy.
Sotta prokýror kúdiktilerdiń esimderin atady:
Shynasyl Abzal Nurǵalıuly
Sakıev Ravıl Magomedovıch
Belǵojaev Shyńǵys Aıdosuly
Azkentaı Darhan Baıylhanuly
Toqtaýbaev Nurbol Muratbekuly
İlıasov Nurqıas Tólekbekuly
Toqtaýbaev Azamat Maratbekuly
Qalıahmet Dıdar Erkinuly
Ysqaq Dýman Qaıdaruly
