بۇگىن، ياعني 28 ساۋىردە شەرزات بولات ءىسى بويىنشا سوتتا كۋاگەر ەلميرا نۇربەكوۆادان جاۋاپ الىنىپ جاتىر. وسى تۇستا، مەملەكەتتىك ايىپتاۋشى دانا سارسەنباي كۋاگەردىڭ جاۋاپتارىنىڭ اراسىندا قاراما-قايشىلىقتاردىڭ بارىن العا تارتتى، دەپ حابارلايدى Dalanews.kz.
"Cءىزدىڭ تەرگەۋ كەزىندە بەرگەن جاۋابىڭىزبەن وسى كەزەكتى جاۋاپتارىڭىزبەن سايكەس كەلمەيدى. 2024 جىلدىڭ 5 قازانىندا ءسىز تەرگەۋشىلەرگە بالا جەرگە قۇلاپ، قان-قان بولعانىن، ال ابزال پىشاقپەن بالانى ارقا جاعىنان ۇرعانىن كورگەنىڭىزدى ناقتى ايتقان ەدىڭىز. وسى جاۋابىڭىزدى قولدايسىز با؟"، – دەپ سۇرادى دانا سارسەنباي.
ال كۋاگەر نۇربەكوۆا ءوز جاۋابىندا:
"ول كەزدە ناقتى ەسىمدە جوق، مەن ورىسشا-قازاقشا ارالاستىرىپ جاۋاپ بەرگەنمىن"، - دەپ جاۋاپ بەردى.
مەملەكەتتىك ايىپتاۋشى دانا سارسەنباي كۋاگەردىڭ تەرگەۋ كەزىندە ناقتى جاۋاپ بەرگەنىن اتاپ ءوتىپ، ءسوزىن جالعاستىردى.
"تەرگەپ-تەكسەرۋ كەزىندە ءسىز ءبارىن ءتۇسىنىپ، ناقتى جاۋاپ بەرگەنسىز. ءقازىر سوتتا كەلگەندە قازاقشا تۇسىنبەدىم دەپ وتىرسىز. حاتتاما بويىنشا ءسىزدىڭ بارلىق جاۋابىڭىز سول كۇيىندە جازىلعان"، – دەپ قوستى دانا سارسەنباي.
ەلميرا نۇربەكوۆا ءوز جاۋابىندا تەرگەۋ كەزىندە "شوك" كۇيىندە بولعانىن جانە ەكى كۇن بويى تەرگەۋشىلەرمەن جۇمىس ىستەگەنىن مالىمدەدى.
"ءبىز ەكى كۇن تەرگەۋ يزولياتورىندا بولدىق. شارشادىق، تاماقتانبادىق، سۋ دا ىشپەدىك. نە ايتقانىم ەسىمدە جوق، سول كەزدە تەك ۇيگە قايتۋدى ويلادىم"، – دەپ ءتۇسىندىردى ول.
ايتا كەتەيىك، بۇگىنگى اشىق سوت وتىرىسىندا شەرزات بولاتتىڭ ىسىندە كۋاگەر رەتىندە تانىلعان ەلميرا نۇربەكوۆادان جاۋاپ الىنىپ جاتىر.
كۋاگەردىڭ ايتۋىنشا، سوتتالۋشىلاردىڭ ءبىرى ونى ارنايى كافەگە شاقىرعان. الدىمەن ولار سول جەردە باس قوسقان، كەيىن دۇكەن ماڭىنا بەت العان. بۇعان دەيىنگى سوت تىڭداۋىندا نۇربەكوۆا قاقتىعىس كەزىندە جىگىتتەردى سابىرعا شاقىرىپ، جانجالدى توقتاتۋعا تىرىسقانىن مالىمدەگەن ەدى.
سوت بارىسىندا جابىرلەنۋشىلەردىڭ ادۆوكاتى مەيىرمان شەكەيەۆ ەلميرا نۇربەكوۆادان شەرزات بولاتتىڭ پىشاق جاراقاتىن قاي جەردەن العانىن جانە ونى قايدان بىلگەنىن سۇرادى. ادۆوكات كۋاگەردىڭ تەرگەۋ كەزىندە قازاق تىلىندە جاۋاپ بەرگەنىن، ال سوتتا ورىس تىلىندە تۇسىنىك بەرىپ وتىرعانىنا دا نازار اۋداردى. ول تەرگەۋ مەن سوتتاعى كۋاگەر جاۋابىنىڭ ايىرماشىلىعىنا كۇمانمەن قارادى.
ەسكە سالا كەتەيىك، 10 ساۋىردە تالدىقورعاندا شەرزات بولاتتىڭ ولىمىنە قاتىستى سوت پروسەسى باستالدى.
سوتتا پروكۋرور كۇدىكتىلەردىڭ ەسىمدەرىن اتادى:
شىناسىل ابزال نۇرعالي ۇلى
ساكييەۆ راۆيل ماگومەدوۆيچ
بەلعوجايەۆ شىڭعىس ايدوس ۇلى
ازكەنتاي دارحان بايىلحان ۇلى
توقتاۋبايەۆ نۇربول مۇراتبەك ۇلى
ءىلياسوۆ نۇرقياس تولەكبەك ۇلى
توقتاۋبايەۆ ازامات ماراتبەك ۇلى
قالياحمەت ديدار ەركىن ۇلى
ىسقاق دۋمان قايدار ۇلى
