Májilistiń jalpy otyrysynda depýtat Baqytjan Bazarbek Almatyda ornalasqan Aqsai bógetiniń qazirgi jai-kúiine qatysty máseleni kóterip, Úkimet basshysy men Bas prokýrorǵa depýtattyq saýal joldady, – dep habarlaidy Dalanews.kz
Depýtattyń aitýynsha, Aqsai bógetiniń 22 milliard teńge turatyn qurylysy 2023 jyldyń sáýirinde toqtatylǵan jáne selden qutqarý bógetteriniń qurylysynda oryn alǵan zańsyzdyqtar áshkere bolyp jatyr.
– Bóget qurylysy Almaty oblysynyń memlekettik sáýlet-qurylys baqylaý organynyń uiǵarýymen toqtatyldy. Buǵan tapsyrys berýshi “Qazseldenqorǵaý” mekemesiniń bastapqy jobaǵa ózgeris engizip, ony memlekettik saraptamaǵa bermeýi sebep bolǵan.
Nátijesinde 30 myń adamnyń ómirin saqtaýǵa tiis nysan tapsyrys berýshiniń salǵyrttyǵynan 2 jyl boiy ruqsatsyz salynyp, bóget sapasy kúmán týdyrýda. Qylmystyq tergeý organy TJD men “Qazseldenqorǵaý” laýazymdy tulǵalarynyń áreketine ádil baǵa beredi dep úmittenemiz, – deidi Baqytjan Bazarbek.
Depýtat osy másele boiynsha prokýrorlyq tekserý júrgizýdi surady.
Sonymen qatar búgin Almatydaǵy Aqsai bógetiniń qurylysyna jaýapty merdiger "Tolagai-2050" kompaniiasy direktorynyń orynbasary Asqar Serdalin kompaniianyń Instagram jelisindegi paraqshasynda "Qazseldenqutqarýdyń" memlekettik mekemesiniń aiyptaýyna jaýap bergen edi.
– Nysan qurylysy Almaty oblysynyń qala qurylysyn baqylaý basqarmasynyń jobalyq qujattamalarǵa túzetýlerdiń memlekettik saraptamadan ótpeýine bailanysty tapsyrys berýshige qatysty uiǵarymyna orai toqtap tur.
"Qazaqstan Respýblikasyndaǵy sáýlet, qala qurylysy jáne qurylys qyzmeti týraly" zańnyń 9-1 taraý, 64-1 bap, jetinshi tarmaǵyna sáikes, jobany memlekettik saraptamadan tek tapsyrys berýshi, iaǵni "Qazseldenqutqarý" mekemesi ǵana ótkize alady.
Nysan qurylysy toqtaǵanyna bir jyldan asty. Qazirge deiin tapsyrys berýshi tarapynan nysannyń jumysyn ýaqytsha toqtatý jáne memlekettik saraptamadan ótý boiynsha jumystar júrgizilgen joq.
Tapsyrys berýshiniń qolynda qajetti qujattardyń bári bar jáne memlekettik saraptamadan ótkizýge eshqandai kedergi joq. Alaida, tapsyrys berýshi óziniń tikelei mindetterin oryndaýdyń ornyna jaýapkershilikti merdigerge artyp qoiýǵa tyrysyp jatyr, – dep jaýap berdi Asqar Serdalin.
Merdiger kompaniia ókiliniń sózinshe, qurylys jumystary búginde 89 paiyz aiaqtalǵan jáne eger jobaǵa túzetýlerdiń memlekettik saraptama qorytyndysy shyqqan jaǵdaida kompaniia tapsyrys berýshimen birge jumysty aiaqtaýǵa daiyn.
Aita keteiik, sóz bolyp otyrǵan bóget Almatydaǵy Naýryzbai aýdanynyń jáne Almaty oblysynyń quramyna kiretin Qarasai aýdanynyń turǵyndaryn selden qorǵaidy dep qarastyrylǵan.
