Nazarbaev Ýniversitetiniń stýdentter birlestigi men klýbtarynyń áleýmettik jelidegi paraqshalarynda osyndai jazbalar men heshtegter paida boldy, dep habarlaidy Dalanews.kz Azattyqqa siltep.
Protecting Students Rights bastamasy 2024 jyldyń aiaǵynda NÝ-de jemqorlyq bolýy múmkin degen habardan keiin shý shyqqan.
Onyń negizin qalaǵan Nazarbaev Ýniversitetiniń 2-kýrs stýdenti Temirlan Qazaqstannyń joǵary oqý oryndarynda stýdent quqyǵyn buzý deregin anyqtap, qujattaýdy maqsat tutatynyn aitady. Onyń ishinde harassment, kemsitý, saiasi is-sharalarǵa qatysýǵa májbúrleýmen qatar, ýniversitetter men stýdentter jataqhanasynda tiisti infraqurylymnyń bolmaýy bar.
Degenmen qazir belsendilerdiń bar nazary qarjylyq tartys tóńireginde.
Protecting Students Rights músheleri "Jetpis úsh milliard teńge. NU stýdentteri jemqorlyqqa qarsy" degen jariialanymda oqý ornynan hattaǵy aiyptaýǵa jaýap berýdi, aýditorlyq esepti tolyq jariialaýdy, qarjylyq zańsyzdyqqa jol bergenderdi jaýapqa tartýdy talap etti.
Osydan keiin Temirlanǵa bireý belgisiz nómirden qońyraý shalypty.
– Mundai bolady dep kútken joqpyn. Tutqany kóterdim. "Bále izdemei, tynysh júr" dep eskertti de, qoia saldy. Naqty bir adamdardyń aty-jónin ataityndai qolymda dálel joq. Áitse de, mundai túsiniksiz nárse jemqorlyq týraly jazbalardan keiin bastaldy, – dedi stýdent.
Aitýyna qaraǵanda, basqa stýdentterge de osyndai habar kelgen, alaida olar jýrnalistermen sóileskisi kelmedi. Temirlan redaktsiia qyzmetkerlerine Telegram jelisindegi anonim akkaýnttardan ýniversitettegi jemqorlyq týraly aita bastaǵan stýdentterge jiberildi degen habarlamalardyń skrinshottaryn tabys etti. Onda: "Bastaryńa bále izdemei, tynysh júrińder", – dep jazylǵan.
Telegram jelisindegi Nazarbaev Ýniversiteti stýdentteriniń tynys-tirshiligi týraly jazatyn NU York Times arnasynyń avtorlary "Katsýdyń haty" men oǵan ýniversitet basshylyǵynyń kózqarasy týraly jan-jaqty jazdy. Jeltoqsan aiynyń aiaǵynda NU York Times adminderi Telegram arnany satý jáne qoǵamdyq jumystan bas tartý týraly usynys túskenin málimdedi. Arna avtorlary muny "únin óshirý" áreketi dep baǵalaidy. Al qańtar aiynda arnaǵa bottar shabýyl jasaǵan. "Mundaidy ádette jaǵymsyz jazbalar jariialaityn jańalyq arnalaryna jasaidy", – dep jazdy pablik. NU York Times arnasynyń adminderi de suhbat berýge qulyq tanytpady.
