Marat Ábdraimuly Baldanbaev – kásibi taǵdyryn óndiris salasymen birneshe jylǵa emes, ondaǵan jylǵa bailanystyrǵan mamandardyń biri. Ol jastaiynan injener bolýdy maqsat etip, Qazaq himiia-tehnologiia institýtyna oqýǵa tústi. Injener-tehnolog mamandyǵyn alyp, 1988 jyly Shymkent munai óńdeý zaýytynda eńbek jolyn bastap, sodan beri osy ujymda qyzmet etip keledi.
30 jyldan astam ýaqyt boiy tazalaý qondyrǵylary tsehynda eńbek etti: aldymen taýar operatory, keiin 2021 jyldan beri injener-tehnolog qyzmetin atqaryp júr. Jyldar boiǵy adal eńbegi eleýsiz qalǵan joq: zaýyttyń 30 jyldyǵyna orai «QazMunaiGaz» kompaniiasynyń Qurmet gramotasymen, 2022 jyly munai-gaz salasyndaǵy eńbegi úshin tósbelgimen marapattalǵan.
«Munai salasy — Qazaqstan ekonomikasynyń tiregi. Bul sala elge tek janarmai men eksporttyq tabys qana emes, milliondaǵan adamǵa turaqty jumys berip otyr. Men úshin bul bos sóz emes — búkil ómirimdi zaýytqa arnadym. Jyl ótken saiyn salanyń qalai damyp, tehnologiialyq jaǵynan jańaryp jatqanyn kórip júrmin. Biz tek munai óńdep qana qoimaimyz — eldiń bolashaǵyn qalyptastyryp jatyrmyz», - deidi Marat Baldanbaev.
Onyń ómirindegi eń mańyzdy qundylyqtardyń biri — urpaqtar sabaqtastyǵy. Búginde zaýytta jubaiy men eki uly da eńbek etedi. «Zaýyt — bizdiń otbasymyzdyń ajyramas bóligine ainaldy», - deidi ol. Onyń eńbek joly — mamandyqqa degen shynaiy adaldyqtyń otbasylyq dástúrge, salanyń tiregine ainalýynyń jarqyn úlgisi.
