مارات ءابدرايم ۇلى بالدانبايەۆ – كاسىبي تاعدىرىن ءوندىرىس سالاسىمەن بىرنەشە جىلعا ەمەس، ونداعان جىلعا بايلانىستىرعان مامانداردىڭ ءبىرى. ول جاستايىنان ينجەنەر بولۋدى ماقسات ەتىپ، قازاق حيميا-تەحنولوگيا ينستيتۋتىنا وقۋعا ءتۇستى. ينجەنەر-تەحنولوگ ماماندىعىن الىپ، 1988 جىلى شىمكەنت مۇناي وڭدەۋ زاۋىتىندا ەڭبەك جولىن باستاپ، سودان بەرى وسى ۇجىمدا قىزمەت ەتىپ كەلەدى.

30 جىلدان استام ۋاقىت بويى تازالاۋ قوندىرعىلارى سەحىندا ەڭبەك ەتتى: الدىمەن تاۋار وپەراتورى، كەيىن 2021 جىلدان بەرى ينجەنەر-تەحنولوگ قىزمەتىن اتقارىپ ءجۇر. جىلدار بويعى ادال ەڭبەگى ەلەۋسىز قالعان جوق: زاۋىتتىڭ 30 جىلدىعىنا وراي «قازمۇنايگاز» كومپانياسىنىڭ قۇرمەت گراموتاسىمەن، 2022 جىلى مۇناي-گاز سالاسىنداعى ەڭبەگى ءۇشىن توسبەلگىمەن ماراپاتتالعان.

«مۇناي سالاسى — قازاقستان ەكونوميكاسىنىڭ تىرەگى. بۇل سالا ەلگە تەك جانارماي مەن ەكسپورتتىق تابىس قانا ەمەس، ميلليونداعان ادامعا تۇراقتى جۇمىس بەرىپ وتىر. مەن ءۇشىن بۇل بوس ءسوز ەمەس — بۇكىل ءومىرىمدى زاۋىتقا ارنادىم. جىل وتكەن سايىن سالانىڭ قالاي دامىپ، تەحنولوگيالىق جاعىنان جاڭارىپ جاتقانىن كورىپ ءجۇرمىن. ءبىز تەك مۇناي وڭدەپ قانا قويمايمىز — ەلدىڭ بولاشاعىن قالىپتاستىرىپ جاتىرمىز»، - دەيدى مارات بالدانبايەۆ.

ونىڭ ومىرىندەگى ەڭ ماڭىزدى قۇندىلىقتاردىڭ ءبىرى — ۇرپاقتار ساباقتاستىعى. بۇگىندە زاۋىتتا جۇبايى مەن ەكى ۇلى دا ەڭبەك ەتەدى. «زاۋىت — ءبىزدىڭ وتباسىمىزدىڭ اجىراماس بولىگىنە اينالدى»، - دەيدى ول. ونىڭ ەڭبەك جولى — ماماندىققا دەگەن شىنايى ادالدىقتىڭ وتباسىلىق داستۇرگە، سالانىڭ تىرەگىنە اينالۋىنىڭ جارقىن ۇلگىسى.