Jármeńkede densaýlyq saqtaý, bilim berý, qurylys, qyzmet kórsetý jáne t.b. salalarda bos jumys oryndaryn tabýǵa bolady.
– Esil University-men birlesip «Astana jastary» jastar resýrstyq ortalyǵy, halyqty jumyspen qamtý ortalyǵy bos jumys oryndary jármeńkesin ótkizdi. Qazirgi ýaqytta 50 kompaniia 500-ge jýyq jumys ornyn usynýda. Olardyń qatarynda memlekettik qyzmet isteri agenttiginiń Astana qalasy boiynsha departamenti, bankter jáne basqa da mekemeler bar, – dedi «Astana jastary» jastar resýrstyq ortalyǵynyń qyzmetkeri Oljas Hamitov.
Esil University jármeńkesinde jumys tapqysy keletinder kóp boldy. Óitkeni munda birneshe jumys berýshimen suhbattasý múmkindigi jasaldy.
– Biz – óz shyǵarmashylyǵy arqyly tyń oilary, ideialary bar jas stýdentterdi izdeitin kompaniiamyz. Bizde turaqty jalaqy, resmi jumysqa ornalasý, kareralyq ósý, tatý ujym bar. Stýdentter bizge túiindemelerin beredi, biz olarmen bailanys ornatamyz, olar bizge óndiristik praktikaǵa nemese jumysqa ornalasýǵa kele alady, – dep atap ótti personal jónindegi menedjer Qymbat Súleimenova.
Al Fariza Dilimbetova bir jyldan keiin diplom alady, biraq qazirdiń ózinde tájiribe jinaý úshin jumys izdep júr. Sebebi, tájiribesiz jumysqa ornalasý qiyn. Fariza siiaqty kóptegen stýdent úshin mundai is-sharalar jaqsy jumys ornyn tabýdyń tamasha múmkindigi bolyp sanalady. Ótken jyly ǵana 250-den astam adam jumysqa ornalasty. Sondyqtan Astanada bos jumys oryndary jármeńkesi toqsan saiyn ótkiziledi.
Aita keteiik, 2022 jyly elordada jastarǵa arnalǵan tórt bos jumys oryndary jármeńkesi ótti. Olarǵa 160-tan astam jumys berýshi men 2,5 myńǵa jýyq jas qatysty. Olarǵa barlyǵy 1 800-den astam bos jumys orny berildi.
