«Blok 20 aqpanda Almaty qalasynda quryldy. Jastardyń Májilis pen máslihattardaǵy ókildigi 30% kvotany jabý úshin ǵana emes, jas kandidattarǵa qoldaý kórsetý ideiasy bizdi alǵa tartty. Búgingi tańda 100-den astam jastarǵa qoldaý kórsetildi. Eń bastysy, biz olardy partiialar nemese salalar boiynsha bólmei, barlyq júgingen kandidattarǵa kómektestik. Árine, bizdiń aýditoriiamyz bar bolǵandyqtan, negizinen áleýmettik jelilerde aqparattyq qoldaý kórsetildi. Jumysymyzdyń mańyzdy kórsetkishteriniń biri - jas kandidat, qoǵamdyq pikir kóshbasshysy Dáýlet Muqaevtyń jeńisi», - dep atap ótti jýrnalist Erqanat Kópjasaruly.
«Jastar Úni» bastamashylarynyń biri Aqbope Táńirbergen partiialyq tizimderde jas kandidattardyń ókildigi týraly statistikany keltirip, bloktyń jumysy jalǵasatynyn atap ótti:
«Keshe biz de barlyǵymen birge alańdap, atqarylǵan jumystyń kórinisi bolady ma eken dep, nátijelerdi kúttik. «Jastar Úni» partiiaǵa qatystylyǵyna qaramastan ótinish bildirgenderdiń barlyǵyna qoldaý kórsetti. Alaida, biz ózimiz úshin partiialyq tizimderde jas kandidattardyń usynylýy boiynsha statistika jasadyq. Mysaly, 19 adamnyń ishinen 1 jas kandidat Jalpyhalyqtyq sotsial-demokratiialyq partiia tiziminde, «Aq jol» - 54 adamnyń 6 - sy, «Baitaq» - 18 - den 1-i, «Respýblika» - 25-ten 5-i, «AMANAT» - 90-nan 17-si, «Halyq partiiasy» 52-den 3-in usyndy, «Aýyl» partiiasy - 25-ten 9-y. Kórsetkishter bar, endi biz bul jas úmitkerlerdiń ekzit pýlldyń sońǵy nátijelerine sáikes tizimge engizilýi boiynsha baqylaimyz», - deidi ol.
Sondai-aq, blok ókilderi qazirgi ýaqytta qandai jumys júrgizilip jatqandyǵy týraly aityp berdi:
«Qazir biz hattamalardy tekserip, partiialyq tizimderdiń jariialanýyn kútýdemiz. Jas depýtattarǵa úlken jaýapkershilik júktelgenin atap ótkim keledi, óitkeni olardy jas sailaýshylar, qoǵamdyq pikir kóshbasshylary qoldaidy. Olar shynymen de Parlamentke jańashyldyq ákeletinine jáne zań shyǵarýshy organdardy «oiata alatynyna» senimdimiz», - deidi Nursultan Qurman.
Aita keteiik, «Jastar Úni» blogynyń bir ailyq qyzmeti kezeńinde jas kandidattardy aqparattyq qoldaý boiynsha jumystar júrgizildi. Mysaly, podkasttar túsirildi, blogtar shyqty, posttar jariialandy jáne taǵy basqalar. Búkil el boiynsha 100-den astam adam qamtyldy.
