Memlekettik qyzmet isteri agenttiginiń basshysy Darhan Jazyqbaevtyń aıtýynsha, búginde jas kadrlardy jumysqa ornalastyrý algorıtmi ázirlengen, mansaptyq ósýdi baǵalaý júıesi, rezervshilerdi irikteý nysandary jetildirilip jatyr. Prezıdenttik jastar kadrlyq rezerviniń keńsesi de qurylǵan, onda «suranys kartalary» jasalyp jatyr.
«Memleket basshysynyń Joldaýynda jastar isin ilgerileýge qatysty aýqymdy mindetter qoıylǵan. Olardy júzege asyrýdyń jańa tásilderi tez ári utymdy sheshimderdi qabyldaýdy talap etedi. Osy oraıda, Prezıdenttik jastar kadrlyq rezerviniń músheleri Prezıdent tapsyrmalaryn júzege asyrýǵa óz úlesterin qosatynyna senimdimin. Jastarda kúsh te, bilim de bar. Olar aǵymdaǵy jaǵdaıdy qaıta baǵamdap, tyń ıdeıalardy usyna alady, memlekettik apparattyń jumysyn joǵary deńgeıge shyǵara alady», – dedi agenttik basshysy.
Al Prezıdenttik jastar kadrlyq rezervi keńsesi keńesiniń tóraǵasy Aıdyn Baıedilovtiń paıymynsha, bul – belsendi jastardy damytý platformasy.
«Prezıdenttik kadrlyq rezerv jastarǵa barlyq shekarany ashatyn teń múmkindikter men daǵdylardy qamtamasyz etý úshin jumysyn jalǵastyratyn bolady. Shyndyǵynda, bul kúrdeli ári kóp sharýany qajet etetin másele, sondyqtan jalpy jaǵdaıdy eskere otyryp, bizdiń keńse atalǵan maqsatqa jetýge jan-jaqty kómektesedi», - dedi ol.
Aıdyn Baıedilov damyǵan motıvasıa júıesi negizinde elimizdiń, onyń ishinde oblystardyń, qalalardyń ózekti máselelerin sheshýge jastardyń keń toptaryn tartý asa mańyzdy ekenin jetkizdi. Qazaqstanda sanaly jáne patrıot, belsendi oıy bar urpaqty qalyptastyrýǵa yqpal etý – búgingi bıliktiń basym baǵyty.
«Jastar ókilderiniń úzdik ıdeıalary men jobalaryn júzege asyrý úshin irikteýdiń ýaqyty keldi. Talantty jáne belsendi kadrlardy anyqtaý, jańa formasıanyń suranysqa ıe mamandarynyń pýlyn qurý maqsatynda olardyń áleýetin damytýǵa járdemdesý kezek kúttirmeıtin iske aınaldy. Jastardyń aǵymdaǵy suranystaryn jáne osy saladaǵy tabysty halyqaralyq tájirıbeni taldaý negizinde memlekettik jastar saıasatyn jetildirý boıynsha usynystar ázirlene berýi tıis», - dedi keńse jetekshisi.
Aıdyn Baıedilov jastarǵa qatysty úzdik ıdeıalardy, jobalardy jáne usynystardy memlekettik organdar men Prezıdent ákimshiliginiń qaraýyna jiberý josparlanyp otyrǵanyn da atap ótti. Demek, bul Prezıdent jarıalaǵan «Halyq únine qulaq asatyn memleket» qaǵıdatyn júzege asyrýdyń jalǵasy ispetti, sondaı-aq kóshbasshylarǵa arnalǵan jańa ozyq ıdeıalardyń uıytqysy.
