Elimizdiń barlyq óńirlerinde óńirlik kadrlyq rezervke irikteý júrgizilip jatyr. Memleket basshysynyń tapsyrmasymen uiymdastyrylǵan Óńirlik kadr rezerviniń «Qurylymdyq suhbat» kezeńi aiaqtaldy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Alǵash ret ótip jatqan bul bastama jas menedjerler pýlyn qalyptastyrýǵa jáne memlekettik qyzmetke daryndy jastardy tartýǵa baǵyttalǵan. Irikteýdi oblystyń kadr komissiiasy júzege asyrady. Jastar úshin ashyq jáne tiimdi áleýmettik saty bolǵan saiysqa 600-den astam adam qujat tapsyrǵan. Mańyzdy jobany Túrkistan oblysynyń ákimdigi men Memlekettik qyzmet isteri agenttiginiń Túrkistan oblysy boiynsha departamenti birlesip ótkizdi. Qurylymdyq suhbatqa óńirlik kadr komissiiasynyń tóraǵasy, oblys ákimi Darhan Satybaldy tóraǵalyq etti.
Eki kúnge jalǵasqan irikteýdiń qorytyndysymen 50-den astam úmitkerdiń ishinen úzdik dep tanylǵan 30 jas óńirlik rezerv quramyna qabyldanady. Óńirlik rezervte bolý merzimi - 2 jyl. Olar jergilikti atqarýshy organdarda «B» korpýsynyń memlekettik ákimshilik laýazymyna konkýrstyq irikteýsiz ornalasa alady. Irikteýge 35 jastan aspaǵan, joǵary bilimdi jáne 3 jyldan kem emes eńbek ótili bar Qazaqstan Respýblikasynyń azamattary qatysty.
Suhbatqa qatysqan kandidattar tańdaǵan salalyq baǵytyna sáikes daiyndaǵan jobalaryn tanystyrdy. Jobanyń maqsatyn, mazmunyn, kútiletin nátijesin, ekonomikalyq-áleýmettik tiimdiligin aityp, qorǵady. Komissiia músheleri tarapynan týyndaǵan saýaldarǵa jaýap berdi.
Úmitkerler densaýlyq saqtaý salasyn damytyp, ardagerler úilerin modernizatsiialaý, múmkindigi shekteýli jandarǵa jaǵdai jasaýdyń jańa joldaryn usyndy. Halyqtyń tabysyn arttyrý joldaryn, tarihi qundylyqtardy saqtaý tásilderin tanystyryp, tólem salasyn tsifrlandyrýdyń jańa joldaryn kórsetti. Jasandy intellektiniń kómegin paidalanýdyń qyr-syry men áleýmettik máselelerdi sheshý joldarymen bólisti.
Sondai-aq irikteýdiń ashyqtyǵyn qamtamasyz etý maqsatynda kandidattarmen suhbattasý kezeńinde qoǵamdyq uiymdardyń ókilderi, ár túrli salalar boiynsha sarapshylar qatysty.
