Jastar jaraly politseige qalai kómektesti?
Kýágerler túsirgen taspa osy. Munda leitenant Timýr Begasylov áli tiri kezi. Qandyqol qylmysker ony aýyr jaralap, politsei qyzylala qan bop jatyr. Nurbaqyt Dáýitqulov osy kezde dereý jumysynan júgirip shyǵyp, jaraly jigitke jantalasa kómek bergen.
«Qanyna qaqalyp jatyr eken. Keiin kóterip alyp murnyn, aýzyn tazalap demalttyq. Sál óz-ózine keldi, biraq shok alǵany baiqaldy», – deidi oqiǵa kýágeri Nurbaqyt Dáýitqulov.
Ashy shyndyǵy sol, qalǵan jurttyń shamasy bolǵan jaitty tek telefonǵa túsirip turýǵa ǵana jetken. Al Nurbaqyt Timýrdyń jaraly basyn jerge tigizbei qandy toqtatý úshin barynsha tyrysyp baqqan. Taǵy 3 qyz oǵan barynsha kómektesken. Daria moinyndaǵy jarasyn tańsa, al Anastasiia esimdi boijetken jolda bint izdep, dári-dármekke júgirgen. Nadejda bolsa jyldam jedel-járdem shaqyrtypty.
«Saqaldyny birden baiqadyq. Ol politsiia qyzmetkerine oq atty. Al kóliktegi politseidi óltirip tastady. Biz birden oilanbastan kómekke umtyldyq», – deidi oqiǵa kýágeri Nadejda Aleksandrova.
Qyzdar qatty qoryqsa da, politseidi jalǵyz tastamaýǵa bel býypty. Jaqyn mańaida lańkestiń qarý asynyp júrgenine qaramastan, Begasylovtyń jarasyn tańýǵa táýekel etken. Bárinen buryn sol kezde oqiǵany qyzyqtap turǵan adamdardyń salqynqandylyǵy boijetkenderdiń janyna batady.
«Bárinen buryn qarap turǵan adamdar janǵa batty. Olarǵa telefonǵa túsirgen áldeqaida qyzyq boldy. ol jaǵdaidy eshqashan umytpaspyn», – deidi oqiǵa kýágeri Anastasiia Harlamova.
Leitenanttyń aýrýhana tóseginde baqilyq bolǵanyn estip jastar egile jylaǵan. Qolynan kelgen kómegin aiamaǵan olar týystaryna qaiǵyryp kóńil aitty.
Derekkózi: stan.kz
