Forbes tiziminde kórinbese de, túrli salalar men aimaqtarda saiasi salmaǵy men ekonomikalyq yqpaly basym tulǵalar bar. Sonyń biri – Tileýhandar áýleti. Bul otbasynyń elge tanymal múshesi – burynǵy Májilis depýtaty, qoǵam qairatkeri Bekbolat Tileýhan. Shishkin_like arnasy bul áýletke tiesili múlikke sholý jasapty, dep habarlaidy Dalanews.kz
Bekbolat Tileýhan jáne onyń otbasy
58 jastaǵy Bekbolat Tileýhan mansap jolyn mýzykant retinde bastaǵan. Qurmanǵazy atyndaǵy Qazaq ulttyq konservatoriiasyn támamdap, sonda halyq áni kafedrasynyń meńgerýshisi boldy. Keiin Respýblikalyq ulannyń Prezidenttik orkestrinde halyq mýzykasy ansamblin basqardy. 2000-jyldardyń basynda Mádeniet jáne aqparat ministrliginiń Mádeniet komitetin basqaryp, keiin mádeniet vitse-ministri qyzmetin atqardy. Nursultan Nazarbaevtyń óleńderine jáne birqatar kórkem filmge án jazǵan. Ol - Qazaqstannyń eńbek sińirgen ártisi.
Bekbolat Tileýhan brneshe jyl boiy Májilistiń III, IV, VI jáne VII shaqyrylymdarynda depýtat boldy. 2021 jyldyń jeltoqsanynda, Qańtar oqiǵasyna on kún qalǵanda densaýlyǵyna jáne Dúniejúzilik etnosport konfederatsiiasyndaǵy jumysyna bailanysty depýtattyq ókilettigin tapsyrdy. Bul konfederatsiiany Túrkiia prezidentiniń uly Bilal Erdoǵan basqarady, al Tileýhan uiymnyń direktorlar keńesiniń múshesi.
Bekbolat Tileýhan qoǵam tarapynan jii synǵa iligip júr. Máselen depýtat Ermurat Bápi ony sottalǵan Qairat Satybaldymen bailanysy úshin synasa, Rinat Zaiytov ony Qańtar oqiǵasy jaily aldyn ala habardar bolsa da, eskertpedi dep aiyptady.
2022 jyly "NeMolchi.kz" qorynyń jetekshisi Dina Tańsári (Dinara Smaiylova) Tileýhandy áielderge qarsy zorlyq-zombylyqqa qatysty zańǵa qarsy adam retinde kórsetti. Ol burynǵy depýtattyń "dástúrli otbasylyq qundylyqtardy" jaqtap sóilegenimen, ózi kóp áiel alǵanyn synǵa aldy.
Jaqyn týystarynyń biznesi
Arna málimetinshe, Bekbolat Tileýhan óziniń kópáiel alýǵa degen kózqarasyn eshqashan jasyrmaǵan. Buǵan deiin BAQ-ta "Bekbolat Tileýhan kóp áielin qalai tatý ustap otyrǵanyn aitty" degen syńaidaǵy birneshe maqala jaryq kórgen.
Zakon.kz saitynyń málimetinshe, burynǵy depýtattyń resmi jubaiy – 58 jastaǵy Raýshan Nesipbai. Onyń atynda Astanada jeke jyljymaityn múlikti jalǵa berý jáne basqarýmen ainalysatyn jeke kásipkerlik tirkelgen. Kásipkerlik jylyna shamamen 2,3 mln teńge salyq tóleidi.
Keibir málimetter boiynsha Tileýhannyń taǵy bir áieli – 42 jastaǵy Janar Tapenova. Ol - eki JShS-nyń teń quryltaishysy, biraq bul kompaniialar qazirgi tańda taratý protsesinde tur. Sonymen qatar, onyń atynda salyqtyq túsimi joq jeke kásipkerlik tirkelgen (jeke jyljymaityn múlikti basqarý jáne jalǵa berý salasynda).
"Ártúrli aqparat kózderine sáikes Bekbolat Tileýhannyń birneshe áielinen 14-16 balasy bar. Úlken uly – 31 jastaǵy Nurmuhamed Tileýhan. Ol - "Raushan_Ness" JShS-nyń iesi, kompaniia qazir belsendi emes, buryn kóterme saýdamen ainalysqan. Kompaniia anasy Raýshan Nesipbaidyń qurmetine atalǵan bolýy múmkin. Taǵy bir uly - 30 jastaǵy Nurdáýlet Tileýhan "Bilim Kózi Education" (bastaýysh jáne jalpy orta bilim berý salasynda) JShS-nyń quryltaishysy, biraq bul kásiporyn da qazir belsendi emes", - dep jazylǵan arna málimetinde.
Bekbolat Tileýhan jýrnalisterge bergen suhbattarynyń birinde ózi at baptaýmen ainalysatynyn aitqan, biraq resmi reestrlerde onyń Qazaqstanda óz atynda tirkelgen biznesi joq.
Bekbolat Tileýhannyń aitýynsha, onyń qorasyndaǵy asyl tuqymdy jylqylardyń biri – tuńǵysh prezident Nursultan Nazarbaevtyń nemere inisi Nurbol Nazarbaevtyń syilyǵy.
