Arnaiy jáne inkliýzivti bilim berýdi damytýdyń Ulttyq ǵylymi-praktikalyq ortalyǵynyń direktory Butabaeva Laýra Asqarqyzy Prezidenttiń Joldaýynda kóterilgen jasandy intellekt pen tsifrlyq tehnologiialardyń eńbek naryǵyna áseri jaily pikir bildirdi,- dep habarlaidy Dalanews.kz
"Búgin Memleket basshysy Qasym-Jomart Toqaev «Jasandy intellekt dáýirindegi Qazaqstan: ózekti máseleler jáne ony túbegeili tsifrlyq ózgerister arqyly sheshý» atty Qazaqstan halqyna Joldaýynda qazirgi zamanda tsifrlyq tehnologiialar men jasandy intellekt eńbek naryǵyn túbegeili ózgertip jatqanyn atap ótti. Osyǵan orai bilim berý júiesi de jańa talaptarǵa beiimdelýi tiis. Bul — ýaqyt talaby men bolashaqqa baǵdarlanǵan naqty qadam.
Arnaiy jáne inkliýzivti bilim berýdi damytýdyń Ulttyq ǵylymi-praktikalyq ortalyǵy úshin bul – erekshe jaýapkershilik. Sebebi inkliýzivti ortadaǵy árbir bala jańa tehnologiialarǵa erte jastan qol jetkizip, zamanaýi quzyretterdi meńgerýge quqyly. Osy turǵydan alǵanda, jasandy intellekt negizderi boiynsha arnaiy oqý baǵdarlamalaryn ázirleý, erekshe bilim berý qajettiligi bar balalarǵa arnalǵan kontentti beiimdeý, muǵalimderdiń tsifrlyq daǵdylaryn damytý jáne ata-analarǵa ádistemelik qoldaý kórsetý basty mindetterdiń qatarynda.
«Qazaq Digital Mektebi» jobasy – aýyldyq jáne shaǵyn jinaqty mektep oqýshylaryna sapaly bilimge teń qoljetimdilik beretin mańyzdy bastama. Bul joba erekshe bilim berý qajettiligi bar balalar úshin de jańa múmkindikter ashady. Oqytý kontentin inkliýziia talaptaryna beiimdeý, tsifrlyq qoljetimdilikti qamtamasyz etý jáne jasandy intellekt múmkindikterin paidalaný arqyly bilim berý sapasyn arttyrý kózdelýde.
Memleket basshysy kótergen taǵy bir mańyzdy baǵyt – kásipkerlerdi balalardy damytý ortalyqtaryn ashýǵa tartý. Bul qoǵamnyń áleýmettik jaýapkershiligin arttyryp qana qoimai, bilim berý infraqurylymyn damytýǵa jáne tsifrlandyrýǵa jańa serpin beredi.
Bizdiń ortalyq bul bastamalardy tolyq qoldaidy. Sonymen birge arnaiy jáne inkliýzivti bilim berý qajettilikterin eskeretin oqý-ádistemelik quraldar ázirleýdi, qoljetimdi tsifrlyq orta qalyptastyrýdy jáne muǵalimderdiń kásibi damýyna úles qosýdy jalǵastyrady.
Jasandy intellektimen jumys isteý quzyretin mektep qabyrǵasynan qalyptastyrý – óskeleń urpaqqa teń múmkindik beretin, adami kapitaldy damytatyn jáne elimizdiń jarqyn bolashaǵyna salynǵan investitsiia bolatyny anyq", - dedi Laýra Asqarqyzy.
