Túrkistan óńiriniń diqandary men kásipkerleri respýblikanyń túkpin-túkpirinen kelgen áriptesterine egistikti ártaraptandyrý, mol ónim alý tásilderi, tamshylatyp jáne jańbyrlatyp sýǵarý tehnologiialary, topyraqty óńdeý, jerdi tyńaitý jóninde bilgenderin úiretip, keńesterin bergen bolatyn.
Seminar-keńeske qatysýshylardy ásirese, Túrkistan óńirinde júzege asyrylyp jatqan úiirgelik sharýashylyqty damytý jobasy qyzyqtyrdy.
Osy jumys qalai júzege asyrylǵanyn kórý úshin seminarǵa qatysýshylar Sairam aýdanyndaǵy 2 sharýanyń úiinde bolyp, sharýashylyǵymen tanysty. Oǵan QR Aýyl sharýashylyǵy ministri Erbol Qarashókeev pen óńirlerden kelgen kásipkerler, ákim orynbasarlary da arnaiy bardy.
Túrkistan oblysynyń ákimi Ómirzaq Shókeev bul bastama arqyly jumyssyzdar sany azaiatynyn, otandyq azyq-túliktiń kólemi artatynyn jáne eldiń áleýeti kóteriletinin jetkizdi.
Sairam aýdanynyń ákimi Ulasbek Sádibekov aýdan kóleminde aýyl sharýashylyǵyn negizgi kásipke ainaldyrǵan otbasylar kóp ekenin aitty.
Seminar qatysýshylary sharýalarǵa suraqtaryn qoiyp, tiisti keńesterin aldy. Túrkistan oblysynyń diqandary men kásipkerleriniń eńbegine tánti bolǵan QR Aýyl sharýashylyǵy ministri Erbol Qarashókeev jas diqanǵa óziniń galstýgin tartý etti.
Túrkistan oblysynda jeke qosalqy úi sharýashylyqtaryn damytý, iaǵni, úiirgelik sharýashylyǵy jaqsy damyp keledi. Bul jobada tamshylatyp sýǵarý ádisi qoldanylady.
Jobaǵa «Eńbek» baǵdarlamasymen jańa biznes-ideialardy iske asyrý memlekettik granty esebinen qoldaý kórsetilýde. 2021 jyldyń ózinde jańadan 525 birlik otbasylyq sharýashylyq quryldy, onyń ishinde 162 birlik úi sharýashylyqtaryna granttyq qoldaýlar kórsetilgen. Óńirde 257 myńnan astam úi sharýashylyǵy bar. Jyl saiyn qosalqy úi sharýashylyqtarynda 310 myń tonnaǵa jýyq ónim óndiriledi. Bul – jalpy kókónis óniminiń 30%-y.
