Elimizge QR Syrtqy ister ministrliginiń shaqyrtýymen kelgen delegatsiia quramynda Amerika Qurama Shtattary «Forbes» jýrnalynyń ókili Aleksandr Lipovsev, Ulybritaniianyń «Opera Now» jýrnalynyń ókili N.Djoýns, Birikken Arab Ámirlikteriniń «The Diplomatic Society» jýrnalynyń ókili Bhana Kirtan, Egipet eliniń «Nil-Kýltýra» telearnasynyń ókili Ahmed Fatma, italiialyq IA «IN TERRIS» agentiginiń ókili Fabio Beretta, ispaniialyq «El Cultura» jýrnalynyń ókili Fernando Dias, japondyq «Kiodo Tsýshin» aqparat agentiginiń ókili Linýma Kenishi bastaǵan 20-dan astam qonaq bar.
Kezdesý barysynda sóz alǵan oblys ákimi Ońtústik Qazaqstan oblysyna arnaiy baspasóz-týry aiasynda kelgen qonaqtarǵa alǵysyn bildirdi.
– Qazaqstannyń kieli jerleriniń kartasy jobasy aiasynda oblysymyzda 104 kieli orynnyń tizimi jasaqtalǵan bolatyn. Óńirimizde týrizm salasyn damytý maqsatynda tarihi oryndardy qalpyna keltirý úshin arnaiy baǵdarlama daiyndalyp, kezeń-kezeńimen iske asyrylyp keledi. Mysaly, aldaǵy ýaqytta Qazyǵurt, Ordabasy taýlaryn jáne ortaǵasyrlyq Otyrar, Saýran, Sairam, Sidaq, Mártóbe qalashyqtary men Jýantóbe, Qaraspan, Kúltóbe siiaqty ejelgi eldi mekenderdi qalpyna keltirý jumystary bastalmaq. Sonymen qatar, bolashaqta Sairam aýdanyndaǵy «Hanqorǵan» arheologiialyq qalashyǵy ashyq aspan astyndaǵy mýzeige ainalatyn bolady, – dedi Janseiit Túimebaev.
Qonaqtar tarapynan alǵashqy sóz kezegin Amerika Qurama Shtattary «Forbes» jýrnalynyń ókili Aleksandr Lipovsev alyp, halyqaralyq deńgeide alǵash ret baspasóz-týryn uiymdastyrǵan oblys ákimine alǵysyn jetkizdi.
Munan soń Ulybritaniianyń «Opera Now» jýrnalynyń ókili N.Djoýns, Birikken Arab Ámirlikteriniń «The Diplomatic Society» jýrnalynyń ókili Bhana Kirtandar sóz alyp, baspasóz týrynyń joǵary dárejede ótetinine senim bildirdi.
Aita keteiik, 2017 jyldyń alǵashqy jarty jyldyǵynda Ońtústik Qazaqstan oblysyna 52 850 sheteldik jáne otandyq týris saiahattap kelgen. Onyń 3600-i sheteldik qonaqtar. Bul kórsetkish ótken kezeńmen salystyrǵanda 50 paiyzǵa kóp.
Kezdesý munan soń erkin formattaǵy pikir almasýǵa ulasty. Sheteldik qonaqtar óńir basshysyna birqatar usynystaryn jetkizip, óńirdiń týrizm salasyna nasihat jóninde kishkentai bolsa da úles qosýǵa ýáde etti.
OQO ákiminiń baspasóz qyzmeti
