وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ مادەنيەت جانە ونەر تاقىرىپتارى بويىنشا ماماندانعان شەتەلدىك جەتەكشى بۇقارالىق اقپارات قۇرالدارىنىڭ وكىلدەرىمەن كەزدەستى.

ەلىمىزگە ق ر سىرتقى ىستەر مينيسترلىگىنىڭ شاقىرتۋىمەن كەلگەن دەلەگاسيا قۇرامىندا امەريكا قۇراما شتاتتارى «Forbes» جۋرنالىنىڭ وكىلى Aلەكساندر ليپوۆسيەۆ،  ۇلىبريتانيانىڭ «Opera Now» جۋرنالىنىڭ وكىلى ن.دجوۋنس، بىرىككەن اراب امىرلىكتەرىنىڭ «The Diplomatic Society» جۋرنالىنىڭ وكىلى بحانا كيرتان، ەگيپەت ەلىنىڭ «نيل-كۋلتۋرا» تەلەارناسىنىڭ وكىلى احمەد فاتما، يتاليالىق يا «IN TERRIS» اگەنتىگىنىڭ وكىلى فابيو بەرەتتا، يسپانيالىق «El Cultura» جۋرنالىنىڭ  وكىلى فەرناندو دياس،   جاپوندىق «كيودو سۋشين» اقپارات اگەنتىگىنىڭ وكىلى لينۋما كەنيشي باستاعان 20-دان استام قوناق بار.

كەزدەسۋ بارىسىندا ءسوز العان وبلىس اكىمى وڭتۇستىك قازاقستان وبلىسىنا ارنايى ءباسپاسوز-تۋرى اياسىندا كەلگەن قوناقتارعا العىسىن ءبىلدىردى.

– قازاقستاننىڭ كيەلى جەرلەرىنىڭ كارتاسى جوباسى اياسىندا وبلىسىمىزدا 104 كيەلى ورىننىڭ ءتىزىمى جاساقتالعان بولاتىن. وڭىرىمىزدە تۋريزم سالاسىن دامىتۋ ماقساتىندا تاريحي ورىنداردى قالپىنا كەلتىرۋ ءۇشىن ارنايى باعدارلاما دايىندالىپ، كەزەڭ-كەزەڭىمەن ىسكە اسىرىلىپ كەلەدى. مىسالى، الداعى ۋاقىتتا قازىعۇرت، ورداباسى تاۋلارىن جانە ورتاعاسىرلىق وتىرار، ساۋران، سايرام، سيداق، مارتوبە قالاشىقتارى مەن جۋانتوبە، قاراسپان، كۇلتوبە سياقتى ەجەلگى ەلدى مەكەندەردى قالپىنا كەلتىرۋ جۇمىستارى باستالماق. سونىمەن قاتار، بولاشاقتا سايرام اۋدانىنداعى «حانقورعان» ارحەولوگيالىق قالاشىعى اشىق اسپان استىنداعى مۋزەيگە اينالاتىن بولادى، – دەدى جانسەيىت تۇيمەبايەۆ.



قوناقتار تاراپىنان العاشقى ءسوز كەزەگىن امەريكا قۇراما شتاتتارى «Forbes» جۋرنالىنىڭ وكىلى Aلەكساندر ليپوۆسيەۆ الىپ، حالىقارالىق دەڭگەيدە العاش رەت ءباسپاسوز-تۋرىن ۇيىمداستىرعان وبلىس اكىمىنە العىسىن جەتكىزدى.

مۇنان سوڭ ۇلىبريتانيانىڭ «Opera Now» جۋرنالىنىڭ وكىلى ن.دجوۋنس، بىرىككەن اراب امىرلىكتەرىنىڭ «The Diplomatic Society» جۋرنالىنىڭ وكىلى بحانا كيرتاندار ءسوز الىپ، باسپا ءسوز تۋرىنىڭ جوعارى دارەجەدە وتەتىنىنە سەنىم ءبىلدىردى.

ايتا كەتەيىك، 2017 جىلدىڭ العاشقى جارتى جىلدىعىندا وڭتۇستىك قازاقستان وبلىسىنا 52 850 شەتەلدىك جانە وتاندىق تۋريس ساياحاتتاپ كەلگەن. ونىڭ 3600ء-ى شەتەلدىك قوناقتار. بۇل كورسەتكىش وتكەن كەزەڭمەن سالىستىرعاندا 50 پايىزعا كوپ.

كەزدەسۋ مۇنان سوڭ ەركىن فورماتتاعى پىكىر الماسۋعا ۇلاستى.  شەتەلدىك قوناقتار ءوڭىر باسشىسىنا ءبىرقاتار ۇسىنىستارىن جەتكىزىپ، ءوڭىردىڭ تۋريزم سالاسىنا ناسيحات جونىندە كىشكەنتاي بولسا دا ۇلەس قوسۋعا ۋادە ەتتى.

 

 

وقو اكىمىنىڭ باسپا ءسوز قىزمەتى