Bul kúni áskeri orkestrmen 500 jaýynger «Ordabasy» alańynan «Ortalyq» saiabaqqa deiin saltanatty marshpen júrip ótip, sap túzedi.
Merekelik jiynǵa qatysqan oblys ákimi Janseiit Túimebaev barsha Ońtústik jurty men jaýyngerlerdi Otan qorǵaýshylar kúnimen jáne Qazaqstan Respýblikasy Qarýly kúshterine – 25 jyl tolýymen quttyqtady.
«Búginde Elbasynyń, Qazaqstan Qarýly Kúshteriniń bas qolbasshysy Nursultan Nazarbaevtyń strategiialyq kóregendiginiń arqasynda Qazaqstan armiiasynyń jańa kelbeti, otanshyl rýhy qalyptasty. Qarýly Kúshter memleketimizdiń turaqty kepiline ainaldy. Sondyqtan bul kún – Otandy qadirleitin, onyń tarihyn qurmetteitin, aibyndy áskerimizdiń ataǵyn asqaqtatqan, memleketimizdiń qýatyn aiǵaqtaityn kún», – dedi ákim.
Munan soń, óńir basshysy eldiń qorǵanys qabiletin kúsheitýge, ulttyq qaýipsizdikti qamtamasyz etýge, azamattardyń múddeleri men quqyqtaryn, zańdylyqty qorǵaýǵa úles qosqan 17 azamatty Qazaqstan Respýblikasynyń «Qurmet» ordenimen, QR memlekettik nagradasy «Erligi úshin» medalimen jáne «Oblysqa sińirgen eńbegi úshin» belgisimen, OQO ákiminiń Gramotasy men Alys hatymen marapattady. Sonymen qatar, 10 azamat QR Qorǵanys ministriniń «Minsiz qyzmet úshin» medalimen nagradtaldy.
Kontserttik baǵdarlamamen jalǵasyn tapqan merekelik sharada «Máńgilik el tuǵyry - Qýatty Armiia» - teatrlandyrylǵan kórinisi qoiylyp, patriottyq ánder shyrqaldy. Sonymen qatar, merekelik basqosýda ońtústikqazaqstandyqtar tikelei transliatsiia arqyly Astana qalasynda ótken QR Qarýly Kúshteriniń 25 jyldyǵyna arnalǵan áskeri paradty tamashalady.
Aita keteiik, elordanyń Qazaq eli alańynda ótken sherýde 5000-nan astam áskeri qyzmetshiler saltanatty marshpen júrip ótse, 300-ge jýyq áskeri tehnika men zamanaýi qarý-jaraq túrleri jurtshylyq nazaryna usynyldy. Al 70-ke jýyq áýe tehnikasy Qazaqstannyń aviatsiialyq áleýeti men jaýyngerlik ázirligin pash etti.
Eske salsaq, biyl Qazaqstannyń Qarýly Kúshteriniń qurylǵanyna 25 jyl. Ýaqyt talabyna sai áskerimiz jańaryp, onyń kúsh-qýaty jyldan-jylǵa nyǵaiyp keledi. Bizdiń óńir – elimizdiń Ońtústik qaqpasy. Óńirimizde Shymkent gornizonyna qarasty 10 áskeri qurylymdyq bólimder Ońtústik shekarasynyń tutastyǵy men tynyshtyǵyn saqtaýda qyzmet etýde.
