Janseiit Túimebaev qarttar úiindegi keiýanalardy quttyqtady
Is-shara barysynda óńir basshysy áielderge qamqorlyq jasaý, kóp balaly analarǵa áleýmettik qoldaý kórsetý qashanda Elbasymyzdyń nazarynan tys qalmaǵanyn jetkizdi.
«Sizderdi, kóktemniń alǵashqy merekesi 8 naýryz Halyqaralyq áielder kúni meiramymen shyn júrekten quttyqtaimyn! Kóktem merekesi kóńilderińizge qýanysh syilap, júzderińizge nur shashsyn. Búginde óńir turǵyndarynyń 1 mln. 446 myńy názik jandylar quraidy. Bul degenimiz elimizdegi burymdylardyń eń kóbi bizdiń oblysta degendi bildiredi. Olardyń arasynda aqyny da, jazýshysy da, ǵalymy da, tipti úidiń de, túzdiń de jumysyn qatar alyp júrgen kásipker de bar. Aimaqtyń ekonomikalyq damýyna qarakóz arýlarymyzdyń qosyp kele jatqan úlesi orasan zor dep bilemin», – dedi Janseiit Qanseiituly.
1965 jyly negizi qalanǵan №5 arnaýly áleýmettik qyzmetter kórsetý ortalyǵynda 77 áiel azamaty qyzmet alýda. 260 orynǵa shaqtalǵan mekemede egde jasyna bailanysty ózine qyzmet kórsetýge qabiletsiz jalǵyzbasty qarttar men birinshi jáne ekinshi toptaǵy múgedekterge arnaýly áleýmettik qyzmetterdiń kepildendirilgen 8 túri kórsetiledi.
Aita keteiik, oblys boiynsha 8 myńnan astam azamat arnaýly áleýmettik qyzmettermen qamtylsa, onyń 2 myńnan astamy jalǵyzilikti qarttar. Búginde jaldǵyzbasty qarttardyń 121-i oblystyq jumyspen qamtýdy úilestirý jáne áleýmettik baǵdarlamalar basqarmasyna qarasty «№5 arnaýly áleýmettik qyzmetter ortalyǵynda» tolyq memleket qamqorlyǵyna alynyp, keshendi qyzmettermen qamtylýda.
Sondai-aq, oblys ákiminiń orynbasary E.Sadyr oblystyq ardagerler úiinde bolyp, óńir basshysynyń atynan aq jaýlyqty analardy aitýly merekemen quttyqtady.
OQO ákiminiń baspasóz qyzmeti
