Mınıstr Baqytjan Saǵyntaevtyń tóraǵalyǵymen ótken jıynda ınfraqurylymdy damytýdyń 2015 - 2019 jyldarǵa arnalǵan jobasy, «Nurly jol» memlekettik baǵdarlamasynyń iske asyrylý barysy jáne energıa tıimdiligi men energıa únemdeýdi arttyrý jónindegi sharalar týraly máseleler talqylandy.
Jıynda sóz alǵan QR Ulttyq ekonomıka birinshi vıse-mınıstri Rýslan Dálenov «Nurly jol» memlekettik baǵdarlamasyn iske asyrýǵa 792 mlrd. teńge qaralǵanyn málimdedi. 1 qarashaǵa deıin onyń 410,8 mlrd. teńgesi nemese 51,9 paıyzy ıgerilgen. Nátıjesinde kólik ınfraqurylymdy, energetıkalyq ınfraqurylymdy jáne turǵyn úı – komýnaldyq sharýashylyq salasyn damytý baǵytyndaǵy birqatar sharýalar atqarylǵan. Máselen, jospar boıynsha 3475 shaqyrymdy quraıtyn 19 joba iske asyrylyp jatsa, jyl sońyna deıin onyń 426 shaqyrymy paıdalanýǵa berilip, 453 shaqyrym jol ashylatyn bolady.
Óz kezeginde Túrkistan oblysynyń ákimi Janseıit Túımebaev óńirdegi kólik ınfraqurylymynyń jaǵdaıymen tanystyryp, atqarylyp jatqan jumystardy baıandady.
«2018 jyly óńirdegi oblystyq mańyzy bar 161 shaqyrymdy quraıtyn joldyń qurylys jumysyna respýblıkalyq búdjetten 3,288 mln. teńge qaralǵan. Sondaı-aq, «Nurly jol» baǵdarlamasy sheńberinde 2019 jylǵa dep uzyndyǵy 300 shaqyrym bolatyn oblystyq mańyzy bar joldy jóndeýge respýblıkalyq qazynadan 7,5 mlrd. teńge bólinip otyr. Osy qarjy tolyǵymen ıgerilse, keler jyldyń sońyna qaraı aımaqtaǵy oblystyq, aýdandyq mańyzy bar joldardyń jaqsy jáne qanaǵattanarlyq jaǵdaıdaǵy úlesin 74,1 paıyzǵa ósirýge múmkindik týady», – dedi Janseıit Qanseıituly.
Sondaı-aq, basqosýda energıa tıimdiligi jáne ony únemdeýdi arttyrý máselesi de qaraldy. QR Investısıalar jáne damý mınıstri Jeńis Qasymbektiń sózinshe, elimizdiń strategıalyq damý jospary jáne jasyl ekonomıkaǵa kóshý jónindegi tujyrymdamasy boıynsha 2020 jylǵa qaraı jalpy ishki óniminiń energıa sıymdylyǵyn kem degende 25 paıyzǵa, 2050 jylǵa qaraı 2 esege deıin tómendetý kózdelgen. Búginde respýblıkadaǵy energıany únemdeý sharalarynyń jospary japonıalyq tájirıbege súıenip jasalýda. Atalǵan salaǵa qatysty aqparatpen qanyqqan Úkimet basshysy oblys basshylaryna osy máselege basa nazar aýdarýdy tapsyrdy. Ásirese, ınvestorlar men energıany kóp jumsaıtyn kásiporyndarmen jumysty jandandyrý qajet ekenin eskertti.
