Ońtústik Qazaqstanda 1 naýryz kúni – Alǵys aitý kúnine arnalǵan saltanatty shara ótti. Shymkenttegi «Royal rose» saltanat saraiynda uiymdastyrylǵan shara, eń aldymen, 200 jastyń «Myń alǵys!» fleshmobymen bastaýyn alyp, etnomádeni birlestikterdiń ókilderi tarapynan beibitshilik belgisi retinde 1000 shar áýege ushyryldy.
Merekelik kezdesýdiń negizgi bóligi saltanat saraiynda jalǵasyp, ótken ǵasyrda qazaq jerine kúshtep qonys aýdarylǵan milliondaǵan etnostardy óz baýyryna basyp, bir úzim nanyn teń bólisken qazaq halqynyń darhandyǵyn, Alǵys aitý kúniniń mán-mańyzyn beineleitin «Qazaq eline myń alǵys!» beineroligi kópshilik nazaryna usynyldy.
Osynaý merekeniń tarihi, saiasi hám tárbielik máni tereńde jatqanyn aityp, barsha óńir turǵyndaryn Alǵys aitý kúnimen quttyqtaǵan oblys ákimi Janseiit Túimebaev jyl saiyn kóktem mezgiliniń osyndai igilikti meirammen bastalatynyna qýanyshty ekenin jetkizdi.
«Qadirli jerlester! Keshirim – adamgershiliktiń arqaýy bolsa, alǵys aitý – berekeli birliktiń bastaýy bolmaq. 1 naýryz – bul eń aldymen Elbasynyń beibitshilik pen kelisim saiasatynyń saltanat qurǵan kúni. Bul ortaq taǵdyr toǵystyrǵan Qazaqstan halqynyń bir-birine ortaq syi-qurmet kórsetetin kúni. Osy sátti paidalana otyryp, el Táýelsizdigin nyǵaitýǵa, onyń qýatyn arttyrýǵa airyqsha úles qosqan barsha azamattarǵa shynaiy alǵysymdy bildiremin»
- dedi aimaq basshysy.
Sonymen qatar, jiynda óńirdegi etnomádeni birlestikterdiń atynan Qazaqstan halqy Assambleiasy ortalyq quramynyń múshesi, oblystyq grýzin etnomádeni birlestiginiń tóraǵasy Zaal Bochoroshvili sóz sóilep, barsha ult pen ulystardyń atynan Qazaq halqyna alǵysyn bildirdi.
Is-sharada kezinde taǵdyr tálkegimen qazaq eline kelgen barsha etnostardyń qonystanýy týraly tarihi málimetter arqaý bolǵan «Baýyrmal el – Qazaqstan!» taqyrybynda teatrlandyrylǵan-sahnalyq qoiylym kórsetilip, kezinde Ońtústik Qazaqstan oblysynda turǵan, qazirgi kezde alys jáne jaqyn shet elderde turatyn birqatar azamattardyń tilek-nietteri toptastyrylǵan «Qazaq eline myń alǵys!» beinejoldaýy jurtshylyq nazaryna usynyldy. Merekelik shara eldegi yntymaq pen birlikti dáripteitin kontserttik baǵdarlamaǵa ulasty.
Aita ketý kerek, Memleket basshysy Nursultan Nazarbaev Qazaqstan halqy Assambleiasynyń qurylǵan kúnin – Alǵys aitý kúni dep jariialaý týraly bastama kótergen bolatyn. Qoǵam tarapynan baiypty bastamaǵa laiyqty qoldaý kórsetilip, 2016 jylǵy qańtarda bul kún Prezident Jarlyǵymen merekeler qataryna qosyldy.
Búginde ulysymyzdyń uiytqysy, bereke-birliktiń bastaýyna balanǵan qasietti ońtústik jerinde 100-den astam etnos ókilderi jarasty ǵumyr keship, ortaq shańyraǵymyzdy kórkeitip otyr. Yntymaǵyn – yrysqa, birligin – berekege teńeitin óńirdegi assambleianyń mańaiyna toptasqan 20 etnomádeni birlestik el igiligi jolyndaǵy túrli bastamalarǵa qoldaý kórsetip, aimaqtaǵy qoǵamdyq kelisimdi saqtaýǵa laiyqty úles qosyp keledi.
Al taiaýda Shymkenttegi «Qazaqstan» kinoteatry qaita qurylymdaýdan ótti. Jaqynda atalǵan nysan oblystyq assambleianyń qyzmetin qamtamasyz etetin qurylymdar men etnomádeni birlestikterdiń igiligine beriletin bolady.
OQO ákiminiń baspasóz qyzmeti
