Ánarý Qaldybektiń advokaty Liazzat Ahatova Janqosh Turarovqa qatysty is jańǵyrtylǵanyn aitty, - dep habarlaidy Dalanews.kz.
"Janqosh Turarovqa qatysty qylmystyq is qaita jańǵyrtylypty. Kelesi apta tergeý qaita bastalady dep habarlady. Biraq aldyńǵy zańsyz shyǵarylǵan qaýlyny (qysqartylǵany týraly) áli alǵan joqpyz. Jarty aidan astam ýaqyt ótti.
Bas Prokýratýraǵa jazylǵan shaǵymnyń, áleý.jelidegi, BAQ-ǵy jariialylyqtyń nátijesi shyǵar. Sońǵy kezde áriptesterimnen, halyqtan Bas Prokýratýra qyzmetkerleriniń jaqsy jumys istep, kóptegen qylmys pen zańbuzýshylyqtardy ashýǵa septigin tigizip jatqandaryn estimin. Bul da bolsa, kóńilge jaǵatyn, úzilgen úmitti jalǵaityn, ádiletti Qazaqstanǵa degen senim oiatatyn jaǵymdy nárse ǵoi. Tek jaman jaǵyn aita bermei, jaqsy jaǵyn da aitaiyq", - dedi advokat.
Aita keteiik, 21 tamyzda Almatynyń Áýezov aýdany politsiia basqarmasyna 1996 jyly týǵan qyz "ózin zorlaǵanyn" aityp, aryz jazǵan edi. Keiin politsiia qylmystyq is qozǵaǵanyn rastady, al tanymal boksshy Janqosh Turarovtyń ózi taǵylǵan aiypty joqqa shyǵardy.
Artynsha politsiia is toqtatylǵanyn habarlady.
"Is júrgizý aiasynda sot-meditsinalyq jáne sot-biologiialyq saraptama júrgizildi, onyń qorytyndysy boiynsha zorlaý faktisi rastamaldy. 20 qazanda Qazaqstan Respýblikasy Qylmystyq is júrgizý kodeksiniń 35-baby 1-bóligi 2-tarmaǵy negizinde sotqa deiingi tergep-tekserýdi toqtatý týraly túpkilikti sheshim shyqty.
Áýezov aýdandyq prokýratýrasy bul sheshimmen kelisti", - dedi politsiia.
Aita keteiik, Janqosh Turarov kásipqoi ringte 2009 jyldan beri óner kórsetip keledi. Ol 28 jekpe-jek ótkizip, onyń 20-syn nokaýtpen jeńgen.
