Jańaózendegi «Burǵylaý» kásiporynynyń kásipodaqqa qysymdy toqtatý, jalaqyny kóterý jáne jumys jaǵdaiyn jaqsartýdy talap etken jumysshylary ashtyq jariialaityndaryn málimdep, qala ákimdigine aryz tapsyrǵan.
Jumysshylardyń sózderinshe, aryzǵa 150 adam qol qoiǵan. «Burǵylaýdyń» jumysshysy Bekarys Tólesinov aryzdy Jańaózen qalasynyń ákimi Elýbai Ábilovtiń atyna joldaǵanyn aitady.
KazPetroDrilling kompaniiasynyń prezidenti («Burǵylaýdyń» bas aktsioneri) Rahmet Hairýllaev munaishylarmen kezdesý kezinde biryńǵai jalaqy júiesiniń aiyrmashylyǵyn esepteýge ýáde berdi. Onyń sózderine qaraǵanda, qysqartylǵan jumys saǵattary qaita esepteledi, bonýs dep atalatyn 13-jalaqy 2017 jyldyń naýyryzynda tólenedi.
Jumysshylardyń kásipodaq tóraǵasy Sádýaqas Bekkalievti qýdalaýdy toqtatý talabyn Hairýllaev oblys prokýroryna bildirý qajetin aitty.
«Burǵylaý» kompaniiasy qazannyń 1-de Jańaózen qalalyq sotyna aryz túsirgen. Jumys berýshi aryzyn qanaǵattandyrǵan Jańaózen qalalyq sotynyń sýdiasy M.Jumaeva jumysshylardyń 30 jáne 1 qazan kúni ótkizgen ereýilderin zańsyz dep taný týraly sheshim shyǵarǵan.
