Túrkistan oblysy Saýran aýdanyndaǵy 12 aýyldyq okrýgte jalpy sany 35 eldi meken bar. Qurylǵanyna jarty jyldan asqan jańa aýdanda keler jyly qurylys qarqyny údeı túspek. Qurylys jumystarymen qatar ınfraqurylym salasyna kóńil bólinip, tabıǵı gazben qamtý jumystary jalǵasady. Bul týraly brıfıńte aýdan ákimi Ǵanı Rysbekov málimdedi, – dep habarlaıdy Dalanews.kz Túrkistan oblysynyń Óńirlik komýnıkasıalar qyzmetine silteme jasap.

2022 jyly 32 eldi mekenge balalar alańy, fýtbol alańy, tenıs korty jáne vorkaýt ornatý josparlanýda. Al, aýyldyq okrýgterdegi basty kóshelerge jaryqshamdar ornatylatyn bolady.

– Aýdan qurylǵaly shalǵaı aýyldardy da aralap, sheshimin tappaı turǵan ózekti máseleler tizbesin jasaqtadyq. Turǵyndardyń máseleleri boıynsha is-shara jospary bekitilip, tıisti jumystar júrgizilýde. Aýdan ortalyǵy Shornaq eldi mekeninen 38 ga jer bólinip, ákimshilik-iskerlik ortalyǵynyń qurylysy kelesi jyly júrgiziledi. Onda aýdan ákimi apparaty ǵımaraty, aýmaqtyq qazynalyq mekemesi, prokýratýra, sot, aýdandyq memlekettik mekemeleriniń ǵımarattary jáne mádenıet úıi ornalasady, – dedi Ǵanı Qurmashuly.

Sondaı-aq, aýdanda bıyl 300 oryndyqqa shaqtalǵan 3 mekteptiń qurylysy júrgizilip, Shaǵa aýyl okrýgindegi mektep qyrkúıek aıynda paıdalanýǵa berilgen. Eski Iqan aýyl okrýgindegi bilim uıasy jyl sońyna deıin paıdalanýǵa beriledi dep josparlansa, Qosmezgil eldi mekenindegi mekteptiń qurylysy 2022 jylǵa ótpeli.