2022 جىلى 32 ەلدى مەكەنگە بالالار الاڭى، فۋتبول الاڭى، تەنيس كورتى جانە ۆوركاۋت ورناتۋ جوسپارلانۋدا. ال، اۋىلدىق وكرۋگتەردەگى باستى كوشەلەرگە جارىقشامدار ورناتىلاتىن بولادى.
– اۋدان قۇرىلعالى شالعاي اۋىلداردى دا ارالاپ، شەشىمىن تاپپاي تۇرعان وزەكتى ماسەلەلەر تىزبەسىن جاساقتادىق. تۇرعىنداردىڭ ماسەلەلەرى بويىنشا ءىس-شارا جوسپارى بەكىتىلىپ، ءتيىستى جۇمىستار جۇرگىزىلۋدە. اۋدان ورتالىعى شورناق ەلدى مەكەنىنەن 38 گا جەر ءبولىنىپ، اكىمشىلىك-ىسكەرلىك ورتالىعىنىڭ قۇرىلىسى كەلەسى جىلى جۇرگىزىلەدى. وندا اۋدان اكىمى اپپاراتى عيماراتى، اۋماقتىق قازىنالىق مەكەمەسى، پروكۋراتۋرا، سوت، اۋداندىق مەملەكەتتىك مەكەمەلەرىنىڭ عيماراتتارى جانە مادەنيەت ءۇيى ورنالاسادى، – دەدى عاني قۇرماش ۇلى.
سونداي-اق، اۋداندا بيىل 300 ورىندىققا شاقتالعان 3 مەكتەپتىڭ قۇرىلىسى جۇرگىزىلىپ، شاعا اۋىل وكرۋگىندەگى مەكتەپ قىركۇيەك ايىندا پايدالانۋعا بەرىلگەن. ەسكى يقان اۋىل وكرۋگىندەگى ءبىلىم ۇياسى جىل سوڭىنا دەيىن پايدالانۋعا بەرىلەدى دەپ جوسپارلانسا، قوسمەزگىل ەلدى مەكەنىندەگى مەكتەپتىڭ قۇرىلىسى 2022 جىلعا وتپەلى.
