Is-sharaǵa Abai atyndaǵy QazUPÝ rektory Takir Balyqbaev, QR Bilim jáne ǵylym vitse-ministri Elmira Sýhanberdieva, QR Bilim jáne ǵylym ministrliginiń Mektepke deiingi jáne orta bilim departamenti direktorynyń orynbasary Sáýle Kabimoldaeva, mektepter men balabaqshalardyń direktorlary, Almaty qalasynyń bilim berý, ákimdik, joǵary oqý oryndarynyń ókilderi qatysty.
Kezdesýdi rektor Takir Balyqbaev ashyp, qazaqstandyq pedagogtardyń mártebesin kóterý máselesin jan-jaqty talqylaýdyń mańyzdylyǵyn alǵa tartty. Óz kezeginde QR BǴM vitse-ministri Elmira Sýhanberdieva:
– Jalpy alǵanda, zań jobasyn talqylaý barysynda barlyǵy 814 usynys kelip túsip, bári qaraldy. Zań jobasynda barlyq pedagogikalyq qyzmetkerler men olarǵa teńestirilgen tulǵalar úshin «pedagog» uǵymy engizip otyrymz... Bilim berý uiymdarynyń menshik nysandaryna qaramastan bilim berý jáne pedagogikalyq qyzmetti júzege asyratyn bilim berý uiymdaryndaǵy laýazymdy qyzmet atqaratyn barlyq pedagogikalyq qyzmetkerlerdi pedagogikalyq qyzmetkerler retinde qarastyrylýda. Jalpy erejeler, mártebesi, pedagogikalyq qyzmeti, quqyqtary men mindetteri, sondai-aq oqytý, qaita daiarlaý jáne joǵary muǵalim biliktiligi máseleleri qamtylǵan, – dedi vitse-ministr.
Al Sáýle Kabimoldaeva óz baiandamasynda birqatar negizgi usynystarǵa toqtaldy. Máselen, oqytýshyny josparlanbaǵan tekserýler men fýnktsiialarmen júktemeý, eńbek daýlaryn talqylaý, bilim berý qyzmetimen ainalysýǵa tyiym salatyn jaǵdailardy qospaǵanda, qyzmettik is júrgizý, tártiptik tergeýler kezinde pedagogtardy qorǵaý sharalary qarastyrý máseleri jóninde áńgimelerdi.
Sonymen qatar muǵalimderdi qysqa merzimde qaita daiyndaýdyń da mańyzdylǵy sóz boldy. Bul – pedagogikalyq bilimi joq, joǵary nemese tehnikalyq jáne kásiptik bilimi bar adamdar úshin joǵary nemese joǵary oqý ornynan keiingi bilim berý baǵdarlamalary boiynsha qosymsha biliktilik nemese pedagogikalyq mamandyq alýǵa múmkindik beredi.
UKT qorytyndysy týraly sertifikat pedagogikalyq jáne arnaiy bilimi joq tulǵalardyń, tehnikalyq jáne kásibi oqý oryndarynyń, orta bilimnen keiingi, joǵary jáne joǵary oqý ornynan keiingi bilim berý uiymdarynyń túlekterin kásiptik qyzmetine qabyldaýdyń negizgi sharty bolyp tabylady. Arnaiy bilimi joq tulǵalar, tehnikalyq jáne kásiptik, orta bilimnen keiingi nemese joǵary bilimi bar jáne keminde úsh jyl tájiribe jinaǵandarǵa pedagogikalyq qaita daiarlaýdan jáne UKT-dan ótý múmkindigi beriledi.
Jańa zańda biliktilikti arttyrý jiiligi 5 jyldan 3 jylǵa deiin qysqartylylǵan. Óitkeni muǵalim kásibi biliktiligin, ziiatkerlik, shyǵarmashylyq jáne jalpy ǵylymi deńgeiin árdaiym jetildirýi mańyzdy. Talqylaý jiynynda QazUPÝ professory Baqytjan Tóleýbekova, QR eńbek sińirgen qairatkeri Aiagúl Mirazova baiandama jasady.
Kezdesý barysynda qatysýshylar tarapynan jalaqynyń kóterilýine, turǵyn úige, jospardan tys fýnktsiialardan qorǵaýǵa, kútpegen tekserýlerge, jumys júktemesin tómendetýge jáne zeinetkerlikke shyqqan kezdegi eńbek ótiline bailanysty suraqtar qoiyldy.
Kezdesý sońynda rektor Takir Balyqbaev QR BǴM-ne alǵysyn bildirip, atalmysh zańnyń shyn máninde nátijeli bolýy úshin zańnyń oryndalýyna tabystar tiledi. Rektor qazaqstandyq pedagogtardyń mártebesin kóterý máselesin keshendi zertteýdiń mańyzdylyǵyn atap ótti. «Pedagog mártebesi týraly» Zań jobasy boiynsha jumys, rektordyń aitýynsha, qazirdiń ózinde serpilis berip otyr. «Memleket basshysy osyndai zań shyǵarýdy tapsyrdy – munyń bári bizdiń muǵalimderimizdiń pedagogikanyń bolashaǵyna úlken qadam bolyp tabylady dep oilaimyn. Sondyqtan, eń aldymen, Memleket basshysynyń bastamasyna alǵysymyzdy bildiremiz. Muǵalim mamandyǵy árdaiym bizdiń qoǵamymyzdyń eń mańyzdy bóliginiń biri. Óitkeni bolashaǵymyz pedagogtardyń kásibiligi men quzyrettiliginiń deńgeiine bailanysty. Birqatar mańyzdy máselelerdi sheshý úshin muǵalimder osy zańnyń damýyna belsene qatysýlary kerek. Árine, respýblikamyzdaǵy aldyńǵy qatarly pedagogikalyq ýniversitet retinde biz bul úderiske belsene qatysatyn bolamyz», – dep rektor jiyndy qorytyndylady.
Rimma JANBAEVA
