Jańa zamannyń bilikti dárigeri
Bas aýyryp, baltyr syzdasa dereý dárigerge júginemiz. Ókinishke orai, men osydan biraz buryn qaterli isik aýrýyna shaldyqtym. Óńeshimde isik paida boldy. Osynyń saldarynan tamaq ishe almai, ál-qýatym álsirep, aýrýym asqynyp ketti. Tipti, keibireýler «bul aýrýdyń emi joq» degende odan saiyn salym sýǵa ketti. Osydan keiin Ońtústik Qazaqstan oblystyq qaterli isik dispanserine barǵanymda, ondaǵy dárigerler maǵan keńirdekti stentteý otasyn jasady. Isiktiń saldarynan tamaq ishýim qiyndap, jaǵdaiym nasharlap ketken men operatsiiadan keiin bir táýlikten soń jazylyp, tolyqqandy tamaq ishe bastadym. Aqyryndap túzelip, qalypqa kelgendeimin. Bir ereksheligi, meniń emdeýshi dárigerim Nurila Altynbekova óte meiirimdi, óz isiniń naǵyz mamany eken. Ol kúnine birneshe naýqastardy qabyldap, jandary jabyrqaý jandarǵa emimen qatar shýaqty lebizin aita otyryp, kóńilderge úmit uialatady.
Emdelý úshin atalmysh dispanserge kelgende baiqaǵanymyz, ujym da bir atanyń balasyndai tatý, yntymaqta áreket etip otyrǵanyna kóz jetkizdik. Qanshama álsirep qalǵan naýqastar osynda kelip ota jasatqan soń, nebári eki-úsh kúnniń ishinde aýralarynan sál de bolsa tyiylyp, aqyryndap jaqsaryp jatqanyn kórdik. Atalmysh dispanserde jatqan naýqastar bul mekemeniń em-shara júrgizý isterine dán riza. Bir baiqaǵanymyz, munda qanshama syrqat jandar túsip, qanshasy syrqattaryna shipa taýyp, kóz aldymyzda shyǵyp jatqanyn kórdik. «Negizi ol mekemeden saýyǵyp em alyp qaitqan adamdar eń aldymen Nuriladai asyl azamatshany tapqan altyn qursaqty anasyna alǵys aitýymyz kerek. Munda kári de, jas ta emdelip, dertine shipa taýyp jatyr. Osyndai biliktiligi mol, meiirimdi dárigerge Jaratqan iemiz dem berse eken, bala-shaǵasynyń rahatyn kórse eken dep tileimiz», – deidi bir top emdelýshiler.
Joǵarǵy sanatty dáriger-radiolog Nurila Altynbekovanyń emin qabyldaǵan jandardyń barlyǵy ony óte tájiribeli, óz isine berilgen eńbekqor maman dep aityp, rizashylyqtaryn bildirýde. Tipti kópshilik ony «alǵys arqalaǵan azamatsha» dep qurmetteidi. Óitkeni talai syrqattyń saýyǵýyna sebepshi bolǵan Nurila osy salada 20 jylǵa jýyq qyzmet atqaryp keledi.
Nurila – óz isiniń úzdigi ǵana emes, ózi myń bolǵyr, óte qarapaiym, kishipeiil jan. Jas radiolog mamandardy daiarlaýda óz mektebin qalyptastyryp júrgen Nurila Hamytqyzyna áriptesteri de «búgingi zamannyń jańa turpattaǵy joǵary dárejeli dárigeri» degen baǵa berip otyr.
«Jaqsynyń jaqsylyǵyn ait, nury tasysyn» demekshi, onshaqty kún boiy qas-qabaǵymyzǵa qarap, saýyǵyp ketýimizge kómekteri tigen Nurila Altynbekova men meiirbike qyzdarǵa aitar alǵysym sheksiz. Adamǵa ómir syilap júrgen dárigerge Jaratqan ie zor densaýlyq, uzaq ǵumyr bersin. «Alǵys alǵan arymas» demekshi, Nurila qaryndasyma eńbegiń janyp, kóptiń alǵysyna bólene ber degim keledi...
Abdýlla Dosmuhamedov,
Túrkistan qalasy
