Qazaqstanda 10 myń gektardan astam jeri bar sharýalarǵa mal sharýashylyǵyn júrgizý mindettelýi múmkin. Bul týraly Úkimettiń keńeitilgen otyrysynda Premer-ministr Oljas Bektenov agroónerkásip keshenin damytýǵa baǵyttalǵan jańa sharalardy tanystyrdy, dep habarlaidy Dalanews.kz.
Jańa talapqa sáikes, iri jer paidalanýshylar tek egin sharýashylyǵymen shektelmei, mal sharýashylyǵyn da qatar damytýy tiis. Eger bul mindet oryndalmasa, memleket jerdi keri qaitaryp alý tetikterin qoldanýy yqtimal. Úkimet bul qadamdy aýyldyq jerlerdegi maýsymdyq jumys saldarynan týyndaityn jumyssyzdyqty azaitýǵa baǵyttalǵan shara retinde túsindiredi.
Qazirgi tańda ósimdik sharýashylyǵy qarqyndy damyp jatqanymen, mal sharýashylyǵynyń ósimi nebári 2–3 paiyz deńgeiinde qalyp otyr. Osy salany jandandyrý úshin birqatar qoldaý tetikteri usynyldy. Atap aitqanda, asyl tuqymdy mal satyp alýǵa jeńildetilgen nesie berý, malshylardyń balalaryna bilim granttaryn bólý, otarly mal sharýashylyǵyn damytý jáne qoldan uryqtandyrý tehnologiialaryn engizý josparlanyp otyr.
Sonymen qatar 2026 jyly Jambyl oblysynda Fufeng Group kompaniiasynyń júgerini tereń óńdeitin iri zaýyty iske qosylady. Joba jylyna 3 million tonna júgerige suranys qalyptastyrady. Al qazirgi ýaqytta Qazaqstanda shamamen 1 million tonna ǵana júgeri óndiriledi.
