QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda kásipkerlik qyzmetti retteýdiń jańa tásilderin iske asyrý máseleleri qaraldy. Ulttyq ekonomıka mınıstri Álibek Qýantyrov, «Atameken» UKP basqarma tóraǵasynyń mindetin atqarýshy Narıman Ábilshaıyqov baıandama jasady, – dep habarlaıdy Dalanews.kz primeminister.kz saıtyna silteme jasap.

2021 jylǵy 30 jeltoqsanda Memleket basshysy elimizdegi kásipkerlik qyzmet salasynda jańa retteý saıasatyn engizý máseleleri jónindegi zańǵa qol qoıǵan bolatyn. Zańnyń qoldanylýyn qamtamasyz etý úshin qabyldanýy qajet quqyqtyq aktilerdiń tizbesi 164 NQA-ny qamtıdy.

Memlekettik baqylaýdyń jańa formalary tekseristerden profılaktıkalyq is-sharalarǵa kóshýdi qamtıtyn bolady. Zań aıasynda tekserister men profılaktıkalyq baqylaý júrgizý kestelerin daıyndaýǵa adamnyń barynsha az qatysýyn qamtamasyz etetin, táýekelderdi basqarý júıesin avtomattandyrý jónindegi normalar zańnamalyq túrde bekitildi.

Úkimetke memlekettik organdardyń bızneske qoıatyn talaptaryn qysqartý maqsatynda tásilderdi sapaly iske asyrýdy qamtamasyz etý tapsyryldy.

Qazirgi kezde mundaı talaptardyń 40%-y jańa tásilderge sáıkes kelmeıdi.  Reformany jańadan iske asyrý bıznes-ortany retteý tıimdiligin arttyrýǵa jáne kásipkerlikti jandandyrý úshin qolaıly ári yntalandyrýshy jaǵdaılar jasaýǵa múmkindik beredi.

Bıznes shamadan tys ákimshilik júktemeniń azaıǵanyn sezine bastaýy tıis. Ol úshin Mindetti talaptar reestrin qurýdy jáne sapaly qalyptastyrýdy qamtamasyz etý qajet.

QR Premer-Mınıstri Ulttyq ekonomıka mınıstrligine «Atameken» palatasymen birlesip, retteýdiń jańa tásilderine sáıkes Mindetti talaptar reestrin qurýdyń kestesin bekitýdi tapsyrdy.

– Qarjy mınıstrligi Ádilet mınıstrligimen birlesip, búdjetti naqtylaý aıasynda «Ádilet» aqparattyq júıesiniń bazasynda Reestrdi qurýǵa qarajat qarastyrsyn, – dedi Álıhan Smaıylov.

Sondaı-aq QR Premer-Mınıstri qabyldanǵan zańǵa sáıkes, buǵan deıingi retteýshilik aktilerge olardyń jańa bazalyq tásilderge sáıkestigi turǵysynan tekserý jáne baǵalaý jumystaryn júrgizý qajet ekenin atap ótti.

Barlyq múddeli memlekettik organdarǵa bıylǵy 1 shildege deıin atalǵan aktilerdi qaıta qaraý tapsyryldy.

– Memlekettik baqylaý jáne bıznestiń esep berý júıesin avtomattandyrý qajet. Sondyqtan Sıfrlyq damý, ınovasıalar jáne aeroǵarysh ónerkásibi jáne Ulttyq ekonomıka mınıstrlikterine Bas prokýratýranyń Quqyqtyq statısıka komıtetimen birge osy júıeni avtomattandyrý boıynsha tıisti sharalar qabyldaýdy tapsyramyn, – dep qorytyndylady QR Premer-Mınıstri.