Dál qazirgi sátte Qazaqstan damý jolynda asa mańyzdy kezeńdi basynan ótkerýde. Qazaqstan Respýblikasynyń Prezidenti usynǵan konstitýtsiialyq reformalar memlekettik júieni jańǵyrtýǵa, demokratiia dińgegin nyǵaitýǵa, ádil jáne ashyq basqarýdy damytýǵa degen barshamyzdyń talap-tilegimizdi aiǵaqtaidy. Konstitýtsiia árqashan qoǵamdyq ómirdiń negizi boldy jáne solai bolyp qala beredi. Ol azamattardyń quqyqtary men bostandyqtaryn bekitedi, basqarý qaǵidattaryn anyqtaidy jáne eldiń damýynyń uzaq merzimdi baǵyttaryn belgileidi. Sondyqtan, negizgi zańǵa engizilgen kez kelgen ózgeristiń mańyzy erekshe jáne ol tek saiasi salaǵa ǵana emes, qoǵamnyń áleýmettik, ekonomikalyq jáne gýmanitarlyq salalaryna da áser etedi.
Osyndai ózgeristerdi kózdeitin reforma 2026 jyldyń 15 naýryzyna josparlanǵan jalpyulttyq referendýmda talqyǵa usynylyp jatyr. Bul azamattarǵa degen senimdi kórsetedi jáne el bolashaǵy halyqtyń tikelei qatysýymen aiqyndalatynyna dálel. Referendým árbir qazaqstandyq úshin ustanymyn bildirýge jáne memlekettiń odan ári damýyna úles qosýyna múmkindik beredi. Meniń oiymsha, bul reformalar zań, azamattardyń quqyqtary jáne úkimettiń jaýapkershiligi basty orynda turatyn jańa memleket qurýǵa degen umtylystyń belgisi. Bul jai ǵana quqyqtyq qujatqa ózgeris engizý emes. Ol – memlekettik institýttardyń tiimdiligin arttyrýǵa jáne qoǵamnyń ár múshesi ózin belsendi jáne qundy sezinýin qamtamasyz etýge baǵyttalǵan qadam. Sol sebepti de reformalardy sarapshylardyń, ǵylymi qaýymdastyq ókilderiniń jáne múddeli azamattardyń qatysýymen jariia jáne ashyq talqylaýdyń mańyzy zor. Bul úkimettiń halyqty tyńdap, ózgeristerdiń qajettiligin túsinip otyrǵanyn aiǵaqtaidy.
Ǵylym jáne densaýlyq saqtaý salasynda eńbek etetin adam retinde, elimizdiń tarihynda alǵash ret jańa Konstitýtsiia jobasynda adami kapitaldy, bilim berýdi, ǵylymdy jáne innovatsiiany damytýǵa memlekettik qyzmettiń strategiialyq baǵyttary retinde basa nazar aýdarylǵanyna asa qýanyshtymyn. Bul qaǵidattardy Negizgi Zańda bekitý ǵylymi zertteýlerdi qoldaý, bilim berý júiesin nyǵaitý jáne zamanaýi tehnologiialardy engizý úshin berik quqyqtyq negiz jasaidy. Bul ásirese qoǵamdyq densaýlyq saqtaý men eldiń ilgerileýimen bailanysty kúrdeli máselelerdi sheshý jolynda kún saiyn eńbek etetin ǵylymi jáne meditsinalyq mekemeler úshin asa mańyzdy. Konstitýtsiiada ǵylym men bilimniń mańyzyn kórsetý arqyly Qazaqstannyń bolashaǵyn qalyptastyrýda bilimge, innovatsiiaǵa jáne árbir azamattyń kásibi áleýetin damytýǵa arqa súieitinin baiqatady.
Sonymen qatar, jańa Konstitýtsiia quqyqty shekteý men ony júzege asyrý kezinde adam quqyqtary men bostandyqtaryn, sonyń ishinde azamattardyń densaýlyǵyna qamqorlyqty qorǵaýdy basym baǵyt retinde kúsheitedi, sondai aq adamnyń qadir-qasieti men jeke basyna qol suqpaýdy qurmetteýge beriletin kepildikterdi nyǵaitady.
Prezidenttiń eldi jańartýǵa jáne jańǵyrtýǵa baǵyttalǵan saiasaty Qazaqstannyń eń aldymen adamǵa baǵyttalǵan, turaqty, básekege qabiletti memleket retinde damýyna jaǵdai jasaidy. Bul memlekettik mekemelerde jumys isteitin jáne bolyp jatqan ózgeristerdiń azamattardyń ómirine qalai áser etetinin kún saiyn kózimen kórip júrgen bárimiz úshin mańyzdy. Men qolǵa alynǵan reformalardy qoldaimyn jáne olardy asa mańyzdy qadam dep baǵalaimyn. Bul – ǵylymdy, bilimdi damytýdy jáne azamattardyń densaýlyǵyna qamqorlyq jasaýdy memlekettik saiasattyń ajyramas bóligine ainaldyrǵan ádiletti, qýatty jáne jańa Qazaqstanǵa aparatyn jol.
QR UFǴO direktory - Málik Ádenov
