Jambyldaǵy jarylys: aýyl turǵyndary Saparbaevqa talap qoidy (video)
Olar jeksenbi kúngi jaǵdaidan qatty shoshynyp qalǵan, dep habarlaidy Dalanews.kz KTK-ǵa silteme jasap.
Bilik ókilderi de bul aýmaqta áli de qaýip bar ekenin moiyndaidy. Sondyqtan áskeriler eldi-mekendegi jurttyń bárin shyǵaryp zalalsyzdandyrý júrgizip jatyr.
Jeksenbi kúni tańǵy saǵat jeti shamasynda Baizaq aýdanyndaǵy áskeri bólimde taǵy da joiqyn jarylys boldy. Gúrs etken daýysty estigen turǵyndar uiqydan tura sala jan-jaqqa qasha jónelgen. Keiin bári basylǵan soń baspanalaryna qaita oraldy.
Al shuǵyl jinalǵan áskeriler men sheneýnikter jurtty sabyrǵa shaqyryp álekke tústi.
Olardyń sózine sensek, burynǵy órtten zaqymdalǵan oq-dáriler jarylypty. Buǵan deiin "qorqýǵa esh negiz joq degen" bilik ókilderine turǵyndar "endi senbeimiz" deidi.
Janar Súiindikova, Qainar aýylynyń turǵyny:
"Endi taǵy qaitalanatyn bolsa, bizdi kóshirsin basqa jaqqa. Aqyry ózderi senimsiz. Kóshirsin, bul jerde turmaimyz. Qalatyndar qala bersin, árkimniń óz erki".
Resmi málimetke súiensek, eshbir adam jaraqat almaǵan jáne eshqandai ǵiramatqa zaqym kelmegen. Biraq turǵyndar keibir úidiń terezeleri synǵanyn kórsetti. Jergilikti bilik jurtqa qaýip bar ekenin túsingen tárizdi.
Óitkeni Qainar aýylynan turǵyndar túgel shyǵarylǵan. 37 adam týystaryn panalaýǵa májbúr. Tipti eldimekendegi qiraǵan baspanalardy qalpyna keltirý jumystary da ýaqytsha toqtady.
Qairat Ismaiyl, Baizaq aýdany ákiminiń orynbasary:
"Qarqyndy jumys júrgizip jatyr. Josparly jarylystar bolýy da múmkin. Soǵan bailanysty ázirge turǵyndardy ishke kirgizbeimiz. Iaǵni bir mezette úiindilerdi jarý boiynsha sharalar qabyldanyp jatyr".
Taý bolyp úiilgen zaqymdalǵan oq-dárilerdi joiyp jiberý kózdelgen. Alaida ol úshin qurylǵan arnaiy komissiia sheshim shyǵarýy tiis. Tek sodan keiin jumys júzege asyrylady.
Al ázirge eldimeken turǵyndary jaqyndarynyń úiinde júre beredi. Qashan óz baspanasyna oralatyny belgisiz. Áskeri bólimniń mańyna qazir eshkimdi jolatpai jatyr.
Keshegi jarylys sheneýnikterdi de qatty qorqytyp tastaǵan tárizdi. Sondyqtan búginnen bastap qaýipsizdik sharalary kúsheitilgen. Qainar aýylyna kire beriste bolok-beketter qoiylyp, politseiler erteli kesh kúzetip tur. Arǵy betke qarai eshkimdi ótkizbei jatyr.
26 tamyzda Baizaq aýdanyndaǵy áskeri qoimada joiqyn jarylys bolyp 17 adam ajal qushqan. Oqys jaǵdaidyń sebebi áli anyqtalǵan joq. Sondai-aq iz-túzsiz ketken áskeri qyzmetker de tabylmai jatyr.
https://youtu.be/AocGF3gzVqo
