Shý qalasyndaǵy ortalyq aýrýhanada dárigerler júkti áiel qaitys bolǵanyn jasyryp, marqumnyń denesin ǵimarattyń jertólesine tastap ketken. Qaiǵyly oqiǵany aýrýhana qyzmetkerleri áieldiń týystaryna habarlamaǵan. Marqumnyń denesin birneshe kún ótken soń, jaǵymsyz iis arqyly izdep júrip, kúieýi tapqan, – dep habarlaidy Dalanews.kz.
Oqiǵa naýryzdyń basynda bolǵan. Aýrýhanaǵa 25 jastaǵy júkti kelinshek joǵary qan qysymymen jáne túsik qaýpimen túsken. Resmi rastalmaǵan aqparatqa súiensek, ol birneshe kún boiy komada bolyp, júrek-qan tamyrlary jetkiliksizdiginen kóz jumǵan. Marqumnyń týystary aýrýhana basshylyǵy bul jaǵdaidy ádeii jasyryp qalýǵa tyrysty dep sanaidy.
Bul jaǵdai áleýmettik jeli arqyly jurtqa tarap, úlken rezonans týǵyzǵan soń QR Densaýlyq saqtaý ministrligi shuǵyl tekseris júrgizýge kiristi.
"Tergeý aiaqtalǵansha Shý aýdandyq ortalyq aýrýhanasynyń bas dárigeri men perzenthana bóliminiń meńgerýshisi qyzmetterinen ýaqytsha shettetildi. Jambyl oblystyq densaýlyq saqtaý basqarmasynyń basshysy Erik Musabaevqa qatań sógis jariialandy", – dep habarlady Densaýlyq saqtaý ministrligi.
Ministrlik ókilderi meditsinalyq kómek kórsetý talaptaryn buzǵan basqa da qyzmetkerler qatań jaýapqa tartylatynyn málimdedi.
Feisbýktegi iri toptardyń birinde Jambyl turǵyndary oblys ákimi Erbol Qarashókeev meditsina máselesine kóp kóńil bólmeitinin aityp, narazylyq bildirgen bolatyn.
"Ákim, qaida qarap otyr? Perzenthanalarǵa kamera ornatý kerek. Aimaqtaǵy eldi-mekender zamanaýi tehnologiialardan jurdaimyz. Meditsinalyq mekemedegi ahýal bosanýǵa yńǵaily bolýǵa tiis", - degen bolatyn jeli belsendileri.
Artynsha QR Densaýlyq saqtaý ministri Aqmaral Álnazarova Jambyl oblysynyń ákimimen kezdesip, óńirdegi perzenthanalardyń jumys sapasyn arttyrý máselesin talqylaǵan bolatyn.
Aldaǵy ýaqytta Shý qalalyq aýrýhanasynyń perzenthana bólimindegi jaǵdaidy jaqsartý boiynsha naqty sharalar qabyldanbaq.
