شۋ قالاسىنداعى ورتالىق اۋرۋحانادا دارىگەرلەر جۇكتى ايەل قايتىس بولعانىن جاسىرىپ، مارقۇمنىڭ دەنەسىن عيماراتتىڭ جەرتولەسىنە تاستاپ كەتكەن. قايعىلى وقيعانى اۋرۋحانا قىزمەتكەرلەرى ايەلدىڭ تۋىستارىنا حابارلاماعان. مارقۇمنىڭ دەنەسىن بىرنەشە كۇن وتكەن سوڭ، جاعىمسىز ءيىس ارقىلى ىزدەپ ءجۇرىپ، كۇيەۋى تاپقان، – دەپ حابارلايدى Dalanews.kz.
وقيعا ناۋرىزدىڭ باسىندا بولعان. اۋرۋحاناعا 25 جاستاعى جۇكتى كەلىنشەك جوعارى قان قىسىمىمەن جانە تۇسىك قاۋپىمەن تۇسكەن. رەسمي راستالماعان اقپاراتقا سۇيەنسەك، ول بىرنەشە كۇن بويى كومادا بولىپ، جۇرەك-قان تامىرلارى جەتكىلىكسىزدىگىنەن كوز جۇمعان. مارقۇمنىڭ تۋىستارى اۋرۋحانا باسشىلىعى بۇل جاعدايدى ادەيى جاسىرىپ قالۋعا تىرىستى دەپ سانايدى.
بۇل جاعداي الەۋمەتتىك جەلى ارقىلى جۇرتقا تاراپ، ۇلكەن رەزونانس تۋعىزعان سوڭ ق ر دەنساۋلىق ساقتاۋ مينيسترلىگى شۇعىل تەكسەرىس جۇرگىزۋگە كىرىستى.
"تەرگەۋ اياقتالعانشا شۋ اۋداندىق ورتالىق اۋرۋحاناسىنىڭ باس دارىگەرى مەن پەرزەنتحانا ءبولىمىنىڭ مەڭگەرۋشىسى قىزمەتتەرىنەن ۋاقىتشا شەتتەتىلدى. جامبىل وبلىستىق دەنساۋلىق ساقتاۋ باسقارماسىنىڭ باسشىسى ەرىك مۇسابايەۆقا قاتاڭ سوگىس جاريالاندى"، – دەپ حابارلادى دەنساۋلىق ساقتاۋ مينيسترلىگى.
مينيسترلىك وكىلدەرى مەديسينالىق كومەك كورسەتۋ تالاپتارىن بۇزعان باسقا دا قىزمەتكەرلەر قاتاڭ جاۋاپقا تارتىلاتىنىن مالىمدەدى.
فەيسبۋكتەگى ءىرى توپتاردىڭ بىرىندە جامبىل تۇرعىندارى وبلىس اكىمى ەربول قاراشوكەيەۆ مەديسينا ماسەلەسىنە كوپ كوڭىل بولمەيتىنىن ايتىپ، نارازىلىق بىلدىرگەن بولاتىن.
"اكىم، قايدا قاراپ وتىر؟ پەرزەنتحانالارعا كامەرا ورناتۋ كەرەك. ايماقتاعى ەلدى-مەكەندەر زاماناۋي تەحنولوگيالاردان جۇردايمىز. مەديسينالىق مەكەمەدەگى احۋال بوسانۋعا ىڭعايلى بولۋعا ءتيىس"، - دەگەن بولاتىن جەلى بەلسەندىلەرى.
ارتىنشا ق ر دەنساۋلىق ساقتاۋ ءمينيسترى اقمارال ءالنازاروۆا جامبىل وبلىسىنىڭ اكىمىمەن كەزدەسىپ، وڭىردەگى پەرزەنتحانالاردىڭ جۇمىس ساپاسىن ارتتىرۋ ماسەلەسىن تالقىلاعان بولاتىن.
الداعى ۋاقىتتا شۋ قالالىق اۋرۋحاناسىنىڭ پەرزەنتحانا بولىمىندەگى جاعدايدى جاقسارتۋ بويىنشا ناقتى شارالار قابىلدانباق.
