Prezident Qasym-Jomart Toqaev Jambyl oblysynyń ákimi Erbol Qarashókeev pen Tótenshe jaǵdailar ministri Shyńǵys Árinovtiń óńirdegi jer silkinisinen keiingi ahýal boiynsha baiandamalaryn tyńdady, dep habarlaidy Dalanews.kz.
Memleket basshysy Premer-ministr Oljas Bektenovke áleýmettik nysandar men turǵyn úilerdi qalpyna keltirý jáne jóndeý jumystaryn júrgizý úshin qajetti kómek kórsetýdi tapsyrdy.
Úkimet oblystaǵy ahýaldy baqylaýǵa aldy.
Buǵan deiin Úkimettik jumys toby jaǵdaidy saraptap, baǵalaý jáne jedel sharalar qabyldaý úshin Jambyl oblysyna jiberilgen bolatyn.
Premer-ministr Oljas Bektenovtiń tapsyrmasy boiynsha Jambyl oblysynda oryn alǵan jer silkinisine bailanysty jergilikti atqarýshy organdarǵa jaǵdaidy taldaý, jedel is-sharalar qabyldaý, keltirilgen shyǵyndy anyqtaý jáne baǵalaý máselelerinde kómek kórsetý úshin tótenshe jaǵdailar vitse-ministri bastaǵan úkimettik jumys toby óńirge jiberildi.
Sondai-aq jumys toby quramynda – Ónerkásip jáne qurylys ministrligi Qurylys jáne TKSh isteri komitetiniń tóraǵasy, «QazQSǴZI» AQ filialynyń basshylyǵy, Úkimet Apparatynyń ókilderi bar.
Premer-ministr birinshi kezekte áleýmettik jáne tirshilikti qamtamasyz etetin nysandardaǵy, jol qatynastary men ónerkásip kásiporyndaryndaǵy jaǵdaidy basym tártippen baqylaýda ustaýdy tapsyrdy. Sonymen qatar nysandardy tekserý, shyǵyndardy baǵalaý jáne derekterdi jinaý boiynsha mobildi toptardyń sanyn kóbeitýdi tapsyrdy.
