Jambyl oblysynda qylmyskerler týraly aqparat ádeıi óshirilip otyrǵan

Jambyl oblysynda qylmyskerler týraly aqparat ádeıi óshirilip otyrǵan - Prezıdentke úndeý jasaldy

Kórkem Aldabergenova 22 sáý. 2025 15:47 3511

Áleýmettik jelilerde Jambyl oblysy boıynsha QR Bas prokýratýrasynyń Quqyq qorǵaý organdarynyń qyzmetin úılestirý departamentiniń qazirgi qyzmetkeri Álıa Qojabekovanyń beıneúndeýi tarady. Ol vıdeoda Qazaqstan prezıdentine úndeý jasap, basshylyq tarapynan zańsyz áreketterge jol berilip jatqanyn málimdegen, dep habarlaıdy Dalanews.kz.

Qojabekovanyń aıtýynsha, departament basshylyǵy Birińǵaı tergeý tiziliminen keıbir málimetterdi qasaqana joıyp, ishki ister organdarynyń qylmystardy ashý statısıkasyna áser etýde.

Qojabekova 2013 jyly bolǵan oqıǵany baıandap berdi.

"Men eńbek demalysyna ketkenmin. Sol ýaqytta departament qyzmetkerleri málimetter bazasynan qylmystyq jaýapqa tartylǵan adamdar týraly aqparatty óshirip tastaǵan. Eńbek demalysynan kelgennen keıin qyzmettik tekseris júrip, meni kináli etip, meni bólim basshysy qyzmetimnen alyp tastady. Men sotqa júginip, jeńdim. Sodan beri maǵan jumysta kún kórsetpeıdi. Meni kishkentaı balammen birge ártúrli aýdandarǵa "jer aýdaryp" jebirgendeı boldy", deıdi Álıa Qojabekova.

Onyń sózinshe, basshylyq bul jaıttan habardar bolǵan. Álıa 11 jyldan keıin Quqyq qorǵaý organdarynyń qyzmetin úılestirý departamentine oralǵan.

"Qaıtyp kelgenimde birińǵaı tergeý tiziliminen keıbir málimetterdi qasaqana joıý derekteri áli bolyp jatqanyn anyqtadym", deıdi Álıa.

Onyń aıtýynsha, bul qyzmetkerler óz áreketterin aqtaý úshin Jambyl oblystyq polısıa organdarynyń prokýratýraǵa joldaǵan raporttaryn syltaý etken. Alaıda, kóp jaǵdaıda bul kúmándi raporttar prokýratýranyń keńsesine (kanselárıasyna) múlde tirkelmegen de bolatyn, ıaǵnı resmı túrde qabyldanbaǵan.

Ol iske qatysy bar birneshe basshynyń atyn ataıdy. Qojabekovanyń aıtýynsha, Bas prokýrordyń qujat aınalymy boıynsha buıryǵyna sáıkes, quqyqtyq statısıka organdaryna barlyq qujattar tek «Qadaǵalaý» aqparattyq júıesi arqyly ǵana joldanýy tıis. Alaıda bul talap jıi elenbeı, ruqsatsyz túzetýler engizilgen, jáne bul ishki ister organdarynyń "jaqsy" statısıkasyn qamtamasyz etýge baǵyttalǵan.

"Bul áreketterge meni kináli etpek boldy, biraq olar ony júzege asyra almady, sebebi eń birinshi bolyp men ózim basshylyqqa raportpen júgindim", deıdi Álıa Qojabekova.

Onyń aıtýynsha, derekter bazasynan eshqandaı negizsiz qujattarsyz qalta urlyqtary týraly ister joıylǵan, sondaı-aq qoǵamdyq oryndarda jasalǵan qylmystar, mas kúıde jasalǵan quqyqbuzýshylyqtar da esepten alynyp tastalǵan.