Jambyl oblysynda antimonopoliialyq zańnamany buzǵan kásiporyn anyqtalyp, aiyppul salyndy jáne monopoliialyq jolmen alynǵan tabystan aiyryldy, dep habarlaidy Dalanews.kz.
Bul týraly óńirlik sottardyń birikken baspasóz qyzmeti habarlady. Isti Moiynqum aýdandyq soty qaraǵan.
Sot materialdaryna sáikes, eki kásiporyn memlekettik satyp alýǵa qatysyp, lottardy ózara bólisý týraly kelisip, bir IP-adresten ótinim joldaǵan. Bul jaǵdai antimonopoliialyq organnyń tekserisi nátijesinde dáleldengen jáne ákimshilik quqyqbuzýshylyq týraly hattamada naqty kórsetilgen.
Sot protsesine qatysqan kompaniia ókilderiniń biri óz kinásin tolyǵymen moiyndady. Kásipkerlerge aiyppuldyń tek 70 paiyzyn tóleýge ruqsat etildi, bul shamamen 418 myń teńgeni qurady.
Antimonopoliialyq is-áreketterdiń nátijesinde alynǵan 2,4 million teńge kólemindegi tabys memleket paidasyna tárkilendi.
Sot qaýlysy zańdy kúshine endi.
